د طالبانو کډوالو چارو وزارت: نېږدې درې زره افغان کډوال له ایرانه، هیواد ته راستانه شول

د طالبانو کډوالو او راستنېدونکو چارو وزارت له ایران څخه هیواد ته د ۲زره او ۸۰۵ تنه کډوالو د ستنېدو خبر ورکړی. دغه وزارت پر خپل ایکس پاڼه لیکلي، چې یاد کډوال د تلې په ۲۹مه د اسلام قلعه بندر له لارې په جبري ډول او ځېنې هغه په خپله خوښه افغانستان ته را ستانه شوي.

د طالبانو کډوالو او راستنېدونکو چارو وزارت د اسلام قلعه د سرحدي آمر له قوله لیکلي، هیواد ته د راستانه شویو کډوالو له جملې یو شمېر کورنۍ یې د مرستو ترلاسه کولو په موخه د کډوالۍ نړیوال دفتر ته ورپيژندلي دي.

بل خوا د طالبانو د کډوالو او راستنېدونکو چارو سرپرست وزیر خلیل حقاني کندهار ولایت ته سفر کړی او په یاد ولایت کې یې د کډوالو چارو ریاست سیمه ایزو چارواکو ته د کډوالو ستونزو ته د رسېدو سپارښتنې کړې دي.

نوموړی داسې مهال کندهار ولایت ته سفر کوي چې هره ورځ له پاکستانه د افغان کډوالو لسګونه کورنۍ افغانستان ته راستنېږي.

په دې ورستیو کې پاکستان او ایران له خپلو هیوادونو د ناقانونه افغان کډوالو د ایستلو پرېکړې کړې. خو د یادو هیوادونو دغو پرېکړو ته د کډوالۍ نړیوال سازمان کلک غبرګون ښودلی دی. او دا یې د کډوالو به برخه کې د نړیوال قانون سره په ټکر کې کړنې بللې دي.