اوچا: روان میلادي کال له افغانستان سره ۱.۲ ملیارډ ډالره بشري مرسته شوې ده
افغانستان په نړۍ کې یو له هغو بې وزلو او جګړه ځپلو هېوادونو دی، چې له لسیزو راهیسې یې د نړۍوالو پر بشري مرستو تکیه کړې ده.
د ملګرو ملتونو د مرستو د همغږۍ ادارې ( اوچا) په خپل یوه تازه راپور کې ویلي چې، سږکال له افغانستان سره دولس سوه مېلیونه ډالره بشري مرسته شوې چې غوښنه برخه یې د امریکا متحده ایالتونو لهخوا ورکړل شوې ده.
د اوچا د راپور له مخې، په دغو مرستو کې تر څلور سوه مېلیونه ډالرو ډېره برخه یې د امریکا د متحدو ایالتونو ده.
له دې سره، د افغانستان لپاره د امریکا شارژدافیرې کرېن ډیکر بیا په اېکس پاڼه لیکلي، دا د متحده ایالتونو لپاره د ویاړ خبره ده چې له افغانستان سره د مرسته کوونکو په سر کې ځای لري.
دغه مرستې په داسې حال کې شوې، چې افغانستان له تېرو څو لسیزو بیا په ځانګړې توګه له تېرو دوو کلونو راهیسې له سختو اقتصادي ستونزو سره مخ دی او د بشري ناورین د رامنځته کېدو اندېښنې د هرې ورځې په تېرېدو سره زیاتېږي.
د خوړو نړۍوال پروګرام په دې وروستیو کې خبر ورکړی و، چې په افغانستان کې د راتلونکي سخت ژمي لپاره د شاوخوا ۱۵ مېلیونه وګړو د لومړنیو اړتیاوو د پوره کولو لپاره د یو میلیارد ډالرو معادل بودجې ته اړتیا لري.
د دغه پروګرام په خبره، په افغانستان کې د مرستو د کموالي له امله ۸۵ سلنه اړمن کسان د خوراکي توکو له نوملړه اېستل شوي دي.
اوسمهال د خوړو د نړۍوال پروګرام په ګډون ډېر شمېر مرستندویه ادارې هڅه کوي، چې د افغانستان د خلکو د اړتیا وړ مرستې ترلاسه کړي؛ ترڅو د بشري ناورین مخه ونیول شي.
