د طالبانو د کډوالو وزارت:تېرو دوو ورځو کې له پاکستانه تر ۶۰۰۰ډېر کډوال هېواد ته ستانه شوي
د طالبانو د کډوالو او بېرته راستنېدونکو چارو وزارت په خپلې اېکس پاڼه لیکلي، چې له ۶۰۰۰ ډېر افغان کډوال هېواد ته راستانه شوي دي.
دغه وزارت لیکلي، چې د ننګرهار ولایت د کډوالو او بېرته راستنېدونکو چارو ریاست د تورخم له لارې د تلې په ۲۷مه او ۲۸مه د ۶۰۴۵ کډوالو له ستنېدو خبر ورکړی.
د تورخم د سرحدي امریت د مالوماتو له مخې، ۱۰۶۲ کورنۍ چې ټولټال ۶۰۴۵ تنه کېږي بېرته هېواد ته راستنې شوې دي.
دغه وزارت زیاتوي، چې دغه کسان له راستنېدو وروسته د مرستو ترلاسه کولو په موخه د کډوالۍ نړۍوال سازمان دفتر ته ورپېژندل شوي.
پاکستان د ناقانونه کډوالو د ورکړل شوي ضرب الاجل د ختمېدو په درشل کې دی، له دغې وېرې افغان کډوال غواړي د دغه ضرب الاجل له پایته رسېدو مخکې دغه هېواد پرېږدي.
په ورته مهال، نن د پنحاب او سند ایالتونو ځایي حکومتونو خبرداری ورکړی، چې ناقانونه کډوالو دې تر ورکړل شوې نېټې دمخه دغه هېواد پرېږدي؛ کنه د نومبر میاشتې له پیلېدو سره هم مهاله دوی پراخه عملیات پیلوي.
