د هند د ملي امنیت سلاکار: په افغانستان کې روان وضعیت د ټولو لپاره د اندېښنې وړ دی
د هند د ملي امنیت سلاکار اجیت ډاول وایي، چې د افغانستان وضعیت د ټولو لپاره د اندېښنې وړ دی او ترهګري د نړۍوال امنیت او سولې پر وړاندې یو له جدي ګواښونو څخه ده.
هندي رسنیو د ښاغلي اجیت ډاول له خولې لیکلي، چې په افغانستان کې وضعیت د اندېښنې وړ دی او په افغانستان کې یې د داسې ټولګډونه حکومت پر جوړېدو ټینګار وکړ، چې په هغه کې د ترهګرۍ او نشهیي توکو د قاچاقو پر وړاندې مبارزه وکړي او د ښځو او ماشومانو حقونه پکې خوندي شي.
ښاغلي ډاول دغه څرګندونې په قزاقستان کې د هند او منځنۍ اسیا د ملي امنیت شورا د سرمنشیانو په دویمه ناسته کې وکړې.
ښاغلي ډاول په افغانستان کې روان وضعیت د ټولو د اندېښنې وړ وباله.
هغه زیاته کړې، چې هند افغانستان سره په بېړنیو بشري مرستو کې هم همکاري لري او د خپلو تګلارو له مخې په افغانستان کې د ورزش هڅونې لپاره، د افغانستان د کرېکټ ملي لوبډله د هند په نړۍوال جام سیالیو کې حضور لري او په دغو سیالیو کې د افغان لوبډلې ملاتړی د امول هندي شرکت دی.
تر دې وړاندې هم هند، د پاکستان او تاجکستان په ګډون له افغانستانه ورپېښېدونکو ګواښونو په تړاو اندېښنه ښودلې وه.
خو طالبانو تل ویلي، چې په افغانستان کې هیڅ کومه ترهګره ډله فعالیت نلري، د نشهیي توکو پر وړاندې یې هم مبارزه کړې او د ښځو د حقونو په اړه د نړۍوالو نیوکې او غوښتنې د دوی په کورني چارو کې لاسوهنه ګڼي.
