د طالبانو د کډوالو وزارت: له پاکستانه تر څلورو زرو ډېر کډوال هېواد ته ستانه شول
د طالبانو د کډوالو او بېرته راستنېدونکو چارو وزارت وایي، چې له پاکستانه تر څلورو زرو ډېر افغان کډوال هېواد ته ستانه شول. دغه وزارت نن پنجشنبه د( تلې ۲۰مه) په خپلې اېکس پاڼه لیکلي، چې د (تلې په ۱۹مه) ۴۰۲۶ افغان کډوال د تورخم او سپین بولدک له لارې هېواد ته ستانه شوي دي.
د تورخم د سرحدي امریت د مالوماتو پر بنسټ، ۴۵۷ کورنۍ او په جبري ډول ۲۶ اېستل شوي کسان چې ټولټال ۲۶۶۷ تنه کېږي هېواد ته راستانه شوي دي.
د دې ترڅنګ د سپین بولدک د سرحدي امریت د مالوماتو پر بنسټ، ۲۱۶ کورنۍ چې ټولټال ۱۳۵۹ تنه کېږي په جبري ډول هېواد ته راستانه شوي دي.
ویل کېږي، چې راستنې شوې کورنۍ د دغو ولایتونو په کډوالو ادارو کې له ثبتېدو وروسته د ملګرو ملتونو عالي کمېشنرۍ او د کډوالو نړۍوال سازمان ته معرفي شوي دي.
دا په داسې حال کې ده، چې د پاکستان حکومت ناقانونه کډوالو ته د اکټوبر میاشتې ترپایه ضرب الاجل ټاکلی چې تر هغې وروسته به دوی د دغو کډوالو پر وړاندې عملیات پیل کړي.
خو اوسمهال د اکټوبر اتلس ورځې لاپاتې دي؛ خو د افغان کډوالو جبري اېستل په پاکستان کې په مېشتو نورو افغان کډوالو کې اندېښنه خوره کړې ده.
