د سپین بولدک له لارې شاوخوا ۱۵۰ افغانې کورنۍ افغانستان ته ستنې کړل شوې
د پاکستان دولتي راډيو خبر ورکړی، چې د کندهار د سپين بولدک له لارې شاوخوا ۱۵۰ افغان کډوالې کورنۍ افغانستان ته ستنې کړل شوې دي. په بلوچستان ایالت کې د چارواکو په خبره، بې اسناده کډوال درې ورځې په کمپونو کې ساتل کېږي او بیا افغانستان ته استول کیږي.
په وروستیو ورځو کې پاکستان په ځانګړي ډول په اسلام اباد او کراچۍ ښارونو کې افغانان نیولي او له دې هیواده یې شړلي دي.
د راپورونو له مخې په تېرو ۲۴ ساعتونو کې څه باندې ۵۰ کورنۍ د تورخم له لارې د ۲۰ لاریو په مرسته افغانستان ته لیږدول شوي دي.
د پاکستان موقت حکومت یوه اوونۍ وړاندې اعلان وکړ چې د روانې میاشتې تر پایه به ۱.۷۳ میلیونه افغان کډوال له هېواده وباسي.
له کډوالو سره دغه سخت دریځی چلند په پاکستان دننه او بهر کې له پراخو غبرګونونو سره مخ شوی دی.
ګڼو نړیوالو او د بشري حقونو سازمانونو له پاکستانه غوښتي چې د بشري ناورین او د طالبانو د ګواښ له امله له دغه هېواده د کډوالو د ایستلو پلان وځنډوي.
