ایمل ولي خان: زه افغان یم او له ما دا تمه مه کوئ چې زما افغان به وهل کیږي او زه به غلی یم
د پښتونخوا لپاره د عوامي نشنل ګوند مشر ایمل ولي خان وايي، چې دوی افغانان دي او په پاکستان کې که څوک له افغانانو سره ناوړه چلند کوي، نو دوی به یې پر وړاندې دریږي. نوموړي په خېبرپښتونخوا کې یوې ولسي غونډې ته ویلي، چې دوی په خټه افغانان او پښتانه دي.
هغه زیاته کړه: “دا دې څوک نه هېروي، چې موږ په قوم افغانان یو او کوم پښتون چې دا نه مني چې زه افغان یم، دی دې خپل پلار بیا بل چېرته ولټوي، کېدی شي له بل چا نه پېدا وي. نو زه افغان یم او له ما نه دا تمه مه کوئ، چې زما وجود او زما افغان ورور به وهل کیږي او زه به په ارام ناست یم”.
ایمل ولي خان د پاکستان حکومت ته ګواښ وکړ، چې په پاکستان کې له افغانانو سره کېدونکی چلند ودروي او دا ډول چلند ورته د زغم وړ نه دی.
نوموړي زیاته کړې، که دا چلند دا ډول روان وي؛ نو دوی به د حکومت د دغه ډول چلند پر وړاندې درېږي.
د ایمل ولي خان په خبره، چې د پاکستان لکونه خلک په بهرنیو هېوادونو کې ژوند کوي او که چېرې له پاکستاني کډوالو سره دا ډول چلند وشي، نو د پاکستان له پاره به څه ډول تمام شي.
هغه حکومت ته په اشارې وویل: “افغانان په امریکا کې ژوند کوي، په اروپا کې ژوند کوي مګر هلته بد امني نه راځي، خو چې په پاکستان کې ژوند کوي تاسو وایئ، چې بدامني یې راوړې، حقیقت خو دا دی چې افغانانو کې مشکل نه شته په تا کې چل دی، دوی هسې ملامته ګڼې”.
دا مهال په پاکستان کې نېږدې څلور نیم میلیونه افغان کډوال ژوند کوي او د پاکستان حکومت پرېکړه کړې، چې غیرقانوني کډوال به له دغه هېواده وباسي.
د پاکستان د حکومت دغه پرېکړه د یو شمېر قامپالو او مذهبي ګوندونو د غبرګونونو سبب شوه او دغو ګوندونو د پاکستان له حکومته وغوښتل، چې خپله پرېکړه بېرته واخلي.
خو نن د پاکستان د سرپرست حکومت لومړی وزیر انوارالحق کاکړ ویلي، په پاکستان کې درې برخې کډوال اوسیږي او د افغانانو په ګډون هغه کډوال چې قانوني اسناد لري هغوی به له له پاکستانه نه ویستل کیږي.
نوموړی ویلي: «موږ د ۱،۸ میلیونه اسناد لرونکو افغان کډوالو د ویستلو په اړه هیڅ خبره هم نه ده کړې او ویل کیږي چې ټول افغانان باید له پاکستان څخه ویستل شي دا اوازه ده، موږ د اسناد لرونکو افغانانو سره هېڅ کار نه لرو.»
تېره اونۍ یو شمېر نړۍوالو سازمانونو هم د پاکستان پر حکومت غږ کړی، چې د بشري او کډوالۍ حقونو ته په کتو دې له افغان کډوالو سره درست او له درناوي ډک چلند وشي.
