له پاکستان او ایران څخه د جبري راستنېدونکو کډوالو لپاره پنډغالي جوړیږي
د طالبانو د کډوالو او بېرته راستنېدونکو چارو وزارت وايي، د کندهار په سپین بولدک، او د ننګرهار په تورخم کې د کډوالو لپاره لنډمهالي پنډغالي جوړوي. دوی وايي دغه پنډغالي به د لنډ مهال لپاره وي چې نوي راستنېدونکي کډوال پکې مېشتیږي.
په کندهار کې د طالبانو ولایت مقام رسنیز دفتر رسنیو ته په لیږل شوې خپرپاڼه کې لیکلي، چې د دغه ډلې د کډوالو او بېرته راستنېدونکو چارو وزارت مرستیال او له پاکستان او ایران څخه د راشړل کېدونکو کډوالو لپاره د لنډمهالو پنډغالو د جوړولو کمیسون مشر یاد ولایت ته سفر کړی چې د کندهار په سپین بولدک ولسوالۍ کې له پاکستان څخه د راشړل کېدونکو کډوالو لپاره لنډمهالی پنډغالی جوړ کړي.
په خبر پاڼه کې د د طالبانو د کډوالو چارو وزارت د مرستیال عبدالرحمان راشد له قوله لیکل شوي، «له ایران او پاکستان څخه په جبري ډول افغانان را ایستل کیږي چې په همدې موخه ګډ کمیسون ته دنده سپارل شوې چې په تورخم، سپین بولدک، اسلام قلعه او نورو سیمو کې له یادو هیوادونو څخه د راستنېدونکو افغان کډوالو ستونزې واوري، د اوسیدو لپاره یې لنډمهاله ځایونه په نښه کړي،او د ژوند لومړنۍ اړتیاوي ورته برابري کړي.»
د طالبانو د کډوالو چارو وزارت داسې مهال د ایران پولې او ډیورنډ کرښې ته نېږدې راستنېدونکو افغان کډوالو ته لنډمهالي پنډغالي جوړوي چې د پاکستان حکومت له لوري د ناقانونه افغان کډوالو د ایستلو لپاره یوازې۲۲ ورځې پاتې دی.
دمګړۍ۴،۴ میلیونه افغان کډوال په پاکستان کې اوسیږي او څه د پاسه یو میلیون یې قانوني اسناد نه لري.
همدارنګه په ایران کې هم د افغان کډوالو پر وړاندې لاریونونه شوي او ایرانې وګړي وايي، افغان کډوال باید له دغه هیواده وشړل شي.
