ګلبدین حکمتیار: اسلام اباد دې د افغان کډوالو د ستنولو په اړه خپله پریکړه بیرته واخلي
د افغانستان د حزب اسلامي مشر ګلبدین حکمتیار له اسلام اباده غوښتي، چې د افغان کډوالو د اجباري اېستلو په اړه دې خپله پریکړه بیرته واخلي.
ګلبدین حکمتیار پر اېکس ټولنیزې شبکې د شنبې په ورځ -د تلې په ۱۵مه- په یوه یادښت کې لیکلي: « قطعاً عادلانه نه ده چي د مهاجرينو انساني قضيه په سياسي اختلاف پورې وتړل شي او د ښه گاونډيتوب خلاف پرېكړه وشي.»
همداراز، پخواني افغان ولسمشر حامد کرزي هم د جمعي په ورځ د تلې په ۱۳مه پر اېکس ټولنیزي شبکې، په پاکستان کې د افغان کډوالو د نیولو او بې قانونه کډوالو ته تر ټاکلې مودې له دغه هېواده د وتلو په اړه غبرګون ښودلی.
هغه له افغان کډوالو سره د پاکستان وروستی چلن «ناسم او د ښه ګاونډیتوب د اصولو او ارزښتونو» خلاف بللی دی.
پخوانی افغان ولسمشر حامد کرزي ویلي وه، چې د پاکستان اوسنۍ ستونزې په افغانستان او افغان کډوالو پورې اړه نه لری.
حکمتیار د خپل یادښت په وروستی برخه کې په کابل کې د طالبانو له حکومته غوښتي چې دغه ستونزې حل او پرې نږدي چې کډوال د ناسمو سیاستونو قرباني شي.
پاکستاني چارواکي افغان کډوال د دغه هېواد په ناامنۍ کې ښکېل بولي او هم پر طالبانو تور پورې کوي چې د پاکستان ضد وسلوالو ته یې افغان خاوره کې پنا ور کړې ده.
طالب چارواکو بیا بیا د پاکستان دا دواړه ادعاوې رد کړې دي.
د پاکستان د کورنیو چارو وزارت، بې قانونه کډوالو ته د اکتوبر تر وروستۍ نېټې د وتلو لپاره وخت ور کړی دی.
د پاکستان حکومت پرېکړه کړې، که تر ټاکلې نېټې بې قانونه کډوال له دغه هېواد ونه وځي د جایداد او کاروبار پرضد به یې هم ګامونه پورته شي.
د پاکستان کورنیو چارو وزارت تېره سې شنبه وویل چې په دغه هېواد کې له څلور میلیونه او څلور لکه افغان کډوالو یو میلیون او څه باندې اوه لکه یې بې قانونه دي.
هممهاله په پاکستان کې د افغان کډوالو د نیولو او ځورولو پېښې هم ډېرې شوې دي.
