سردار حسین بابک په پاکستان کې د افغانانو د «تذلیل» د مخنیوي غوښتنه وکړه
د عوامي نېشنل ګوند مخکښ مشر سردار حسین بابک په پاکستان کې د افغان کډوالو د «تذلیل یا سپکاوي» د مخنیوي غوښتنه وکړه. نوموړي یوه ګوندي غونډه کې د مذهبي ډلې جماعت اسلامي پر مشر سراج الحق غږ وکړ چې په دې برخه کې ور سره مرسته وکړي.
د ښاغلي بابک د خبرو ویډیو د نوموړي د ګوند پر اېکس نن خپره شوې ده.
هغه د خپلې ډلې پلویانو ته وايي: «تاسو نن سبا وګورئ چې دا زموږ د افغانانو بچو، وروڼو، خوېندو او مېندو په دې تاڼو، لارو کوڅو، کمپونو او بازارونو کې دومره تذليل روان دی چې زه نه ګڼم چې دومره تذلیل د چا هم شوی وي یا به کېږي، څومره چې زموږ د افغانانو خویندو میند، مشرانو او بچو کېږي.»
هغه وویل، کله چې د افغان شوروي جګړه پیل شوه جماعت اسلامي او نورو ګوندونو او یوې ادارې- چې په تلویحي ډول یې اشاره ای اېس ته وه- په افغانستان کې د جګړې ملاتړ کاوه.
نوموړي زیاته کړه اوس د جماعت اسلامي له مشر سراج الحق غواړي چې د پاکستان په ګوټ ګوټ کې له افغان کډوالو سره د روان حالت په مخنیوي همکاري وکړي.
هغه زیاته کړه: «نن خپل پښتون مشر سراج الحق ته وايو چې راځه چې د خپلو مېندو خوېندو سره ودرېږو او دوی ته ووايو چې زمونږ د مېندو خوېندو تذليل دې نه کوي.»
تراوسه له افغان کډوالو سره د پاکستان د امنیتي ادارو د ورستي چلن په هکله د جماعت اسلامي د مشر سراج الحق کومې څرګندونې رسنیزې شوې نه دي.
خو د پاکستان د جمعیت علمای اسلام مشر مولانا فضل رحمان له افغان کډوالو سره د پاکستان د امنیتي ځواکونو وروستی چلن غندلی دی.
هغه ویلي د نړۍ د انساني حقونو له ادارو غواړي چې پاکستان ته ورشي او د افغان کډوالو اوسنی حالت وګوري.
په افغانستان کې د طالبانو واکمنېدو پسې په پاکستان کې له افغان کډوالو سره د پولیسو چلن هم د وخت په تېرېدو سخت شوی دی.
د پاکستان کورنیو چارو وزارت تېره سې شنبه په دغه هېواد کې بې قانونه کډوالو ته د اکتوبر تر وروستۍ نېټې د وتلو لپاره وخت ور کړی دی.
د پاکستان حکومت وايي، په دغه هېواد کې ۴.۴ میلیونه افغان کډوال اوسېږي چې ۱.۷ میلیونه یې بې قانونه دي.
د پاکستان له نوې پرېکړې وروسته په دغه هېواد کې له افغان کډوالو سره د زور زیاتي ویډیووې هم خپرېږي.
د ملګرو ملتونو او بښنې نړیوال سازمان په ګډون مختلفو ادارو له اسلام اباد غوښتي چې د افغان کډواول په هکله وروستۍ فیصله بېرته واخلي.
