امرالله صالح: له پاکستانه د افغان کډوالو اېستل د «باج اخیستنې» لپاره د لارې جوړول دي
د افغانستان د ولسمشر پخوانی مرستیال وايي، له پاکستانه د افغان کډوالو اېستل له نړۍوالې ټولنې څخه د باج اخیستو لپاره یوه پلمه ده. ښاغلی صالح په دې باور دی، چې د پاکستان حکومت غواړي «اروپايي ټولنه، امریکا او نړۍوال سازمانونه په دې مسله خبرو اترو ته اړ کړي.»
د پاکستان حکومت د دوشنبې په ورځ (د تلې ۱۰مه) اعلان وکړ، چې له دغه هېواده به ۱.۱ میلیونه ناقانونه کډوال وباسي.
د پاکستان د دولتي خبري اژانس اسوشېټېډ پرېس د راپور له مخې، په دې پرېکړه لیک کې هغه «افغانان چې د استوګنې کارتونه لري» هم شامل دي.
د پاکستان دغه اقدام سختې نیوکې هم له ځانه سره لرلې دي.
د پاکستان د بشري حقونو کمېسیون وايي، له دغه هېواده د افغان کډوالو د اېستلو په اړه د پاکستان د حکومت پرېکړه د بشري حقونو د نړۍوالو قوانینو خلاف ده او باید ژر تر ژره لغوه شي.
د طالبانو ویاند ذبیح الله مجاهد هم له افغان کډوالو سره د پاکستان د حکومت چلند د نه منلو وړ بللی او له پاکستانه یې وغوښتل، چې د افغان کډوالو د اېستلو په اړه پر خپله پرېکړه له سره غور وکړي.
امرالله صالح د پنجشنبې په ورځ په اېکس پاڼه لیکلي چې، د پاکستان حکومت غواړي د کډوالو د اېستلو د مسلې په راپورته کولو سره «د هېواد له جوړښتي او سیاسي ستونزو څخه د خلکو پام واړوي» او پر ځای یې د اقتصاد، امنیت او حکومتولۍ په برخه کې افغان کډوال د «یوې مهمې ستونزې» په توګه معرفي کړي.
ښاغلي صالح ټینګار وکړ، چې پاکستان درواغ وايي او افغان کډوال به ونه باسي.
ښاغلي صالح همدا راز د اسلام اباد او طالبانو ترمنځ واټن «مبالغه» وبلله او زیاته یې کړه، چې د دوی د سرچینو له مخې، اوسمهال په افغانستان کې د ایاېسای څه باندې ۱۰۰۰ پټ افسران شته، چې شاوخوا ۳۰۰ یې په رسمي ډول په هرات، بلخ، ننګرهار او کندهار ولایتونو کې د پاکستان په سفارتونو او قونسلګریو کې کار کوي.
نوموړی د افغان طالبانو او اسلام اباد ترمنځ واټن «په افغانستان کې د پاکستان د ګناه او لاسوهنې د تاریخ د سپینولو هڅه» ګڼي.
