حامد کرزی: د پاکستان اوسنۍ ستونزې په افغانستان او افغان کډوالو پورې اړه نه لري
پخوانی افغان ولسمشر حامد کرزی وايي، د پاکستان اوسنۍ ستونزې په افغانستان او افغان کډوالو پورې اړه نه لری. نوموړی د جمعې په ورځ یوه بیان کې له افغان کډوالو سره د پاکستان وروستی چلن «نامناسب او د ښه ګاونډیتوب د اصولو او ارزښتونو» خلاف بللی دی.
د حامد کرزي دا غبرګون په پاکستان کې د افغان کډوالو د نیولو او بې قانونه کډوالو ته تر ټاکلې مودې له دغه هېواده د وتلو په هکله دی.
پاکستاني چارواکي افغان کډوال د دغه هېواد په ناامنۍ کې ښکېل بولي او هم پر طالبانو تور پورې کوي چې د پاکستان ضد وسلوالو ته یې افغان خاوره کې پنا ور کړې ده.
طالب چارواکو بیا بیا د پاکستان دا دواړه ادعاوې رد کړې دي.
خو حامد کرزی دې دوو مسلو ته له اشارې پرته خپل فیسبوک کې لیکي: «د پاکستان اوسني مشکلات نه په افغانستان او نه هم په افغان مهاجرینو پورې اړه لري.»
د نوموړي په خبره، په پاکستان کې د افغان مهاجرینو شتون دغه هېواد ته گڼ اقتصادي او اجتماعی منفعتونه ور په برخه کړي دي.
د پاکستان کورنیو چارو وزارت تېره سې شنبه وویل چې په دغه هېواد کې له څلور میلیونه او څلور لکه افغان کډوالو یو میلیون او څه باندې اوه لکه یې بې قانونه دي.
دغه وزارت دې بې قانونه کډوالو ته د اکتوبر تر وروستۍ نېټې د وتلو لپاره وخت ور کړ.
هممهاله په پاکستان کې د افغان کډوالو د نیولو او ځورولو پېښې هم ډېرې شوې دي.
د پاکستان وروستۍ پرېکړې ته د دغه هېواد د انساني حقونو کمېسون هم غبرګون ښودلی او له نړیوالو قوانینو سره یې په ټکر کې بللې ده.
د بښنې نړیوال سازمان هم له پاکستان غوښتي چې د افغان کډوالو تاریخي ملاتړ روان وساتي.
حامد کرزي هم د پاکستان وروستۍ پرېکړه د افغان کډوالو د نږدې ۴۰ کلنې مېلمه پالنې سره په ټکر کې بللې ده.
