د پاکستان بهرنیو چارو وزارت وايي، د افغان کډوالو په هکله یې پالیسي نه ده بدله شوې
د پاکستان د بهرنیو چارو وزارت ویانده وايي، د افغان کډوالو په هکله په دغه هېواد کې پالیسي نه ده بدله شوې. ممتاز زهرا بلوڅ د پنجشنبې په ورځ خبریالانو ته وویل، اسلام اباد د قانوني کډوالو نه، بلکې د بې قانونه کډوالو خلاف ګامونه پورته کوي.
د هغې په خبره، پاکستان د کوم ځانګړي شهریت یا وګړتوب خلاف نه دی، بلکې د افغانانو په ګډون په دغه هېواد کې د ټولو بې قانونه استوګنو پرضد عملیات کوي.
پاکستاني چارواکي افغان کډوال د دغه هېواد ناامنۍ کې ښکېل ګڼي او تازه د پښتونخوا امنیتي چارواکو ویلي چې د دغې صوبې په ۷۵ سلنه بریدونو کې افغانان لاس لري.
په دې وروستیو کې د پاکستان امنیتي ځواکونو په مختلفو ښارونو په تېره کراچۍ او اسلام اباد کې سلګونه افغان کډوال نیولي دي.
په دوی کې داسې کسان هم شته چې پاکستان کې د اوسېدو قانوني اسناد هم لري.
په اسلام اباد کې د طالبانو سفارت وايي، درې افغانان تر نیول کېدو وروسته وژل شوي دي.
د پاکستان حکومت بې قانونه افغان کډوالو ته د اکتوبر تر پایه د وتلو وخت ور کړی دی.
د طالبانو د ملي دفاع وزیر د افغان کډوالو په تړاو د پاکستان دا پرېکړه غندي او ناعادلانه یې بولي.
ملا یعقوب مجاهد ویلي، چې دغه ډول پرېکړې د دواړو هېوادونو اړیکې ترینګلې کوي.
نوموړي نن په یوه غونډه کې د پاکستان له خلکو او علماوو وغوښتل، چې خپل حکومت له دې پرېکړې راوګرځوي.
د ملګرو ملتونو کډوالو ادارې هم د اسلام اباد د دې پرېکړې مخالفت کړی او ویلي یې دي چې کډوال باید پخپله خوښه افغانستان ته ستانه شي.
د بښنې نړیوال سازمان هم له پاکستان غوښتي چې د افغان کډوالو له ځورولو لاس واخلي.
