ملا خیرخواه: له مدرسو ټول فارغان په دولت کې ځای پر ځای شوي دا پر موږ د الله فضل دی

د طالبانو د اطلاعاتو او فرهنګ وزارت سرپرست ملا خیرالله خیرخواه وايي، چې د جګړې پر مهال یې له مدرسو ګڼ ملایان فارغول مګر دوی اندېښمن وو، چې دومره ډېرو خلکو ته به په کوم ځای کې دندې ورکوي، خو اوس ټول په دولت کې ځای پر ځای شوي دي.

هغه وايي: “ هماغه خلک البته له هغوی ډېر رافارغ شول او ټول په دولت کې کار کوي، خلک شکایت کوي چې زموږ د جوماتونو ملایان هم دولت ته تللي؛ دا د خدای فضل دی”.

د طالبانو یو لوړ رتبه چارواکی دا خبرې په داسې مهال کوي، چې نړۍواله ټولنه د دوی حکومت د یوې ډلې حکومت ګڼي او د ټول شموله حکومت د جوړېدو غوښتنه یترې کوي، خو د طالبانو د بهرنیو چارو وزیر امیر خان متقي بیا دا ادعا ردوې او د طالبانو حکومت ټول شموله بولي.

ملا خیرخواه نن یکشنبه (د تلې ۹مه) په کابل کې د ځوانانو په یوې غونډې کې له ځوانانو غوښتي، چې له افغانستان څخه دې نه وځي او هڅه دې وکړي چې په افغانستان کې پاتې شي.

هغه وايي، چې یو شمېر “ویشتل شوي شیطانان” د افغانانو تر منځ اختلافات اچوي او هڅه کوي، چې خلک بې لارې کړي.

دا چې له ویشتل شویو شیطانانو څخه د نوموړي موخه څه وه، په اړه یې توضیحات نه دي ورکړي، خو زیاته کړې یې ده چې نړۍوال هڅه کوي له افغانستان څخه افغان کادرونه وباسي.

د طالبانو د اطلاعاتو او فرهنګ وزیر زیاتوي، چې یو شمېر خلک د طالبانو په ښو پرده اچوي او نیمګړتیاوې یې بیانوي.

هغه وویل:“ هغه خلک چې نارې وهي، چې باید داسې وشي او داسې وشي، د دوی ګټې دلته نغښتې دي، د فابریکو خراب شیان یې زموږ په باډرونو خرڅول”.

نوموړي د رسنیو پر خپرونو هم نیوکه وکړه او ویې ویل، چې ډېرو کوچنیو پېښو ته په منفي بڼه انعکاس ورکوي.

ملا خیرخواه زیاته کړه: “ دا خبر غلطه ده، چې خلک وايي کار نشته او ځوانان لاړل ، هغوی چې تللي دوه ډوله خلک دي یو خو هغه چې په خارجي عقیده روزل شوي وو او هغوی ته ویل شوي وو، چې هر څه هلته دي او یا دا دي چې له خارج څخه ورته تنابونه راغځیږي”.

د طالبانو دغه لوړپوړي چارواکي یوې عینې پېښې ته په اشارې وايي، چې له بهرنیو هېوادونو څخه یو شمېر کادرونو ته زنګونه وهل کیږي، چې له افغانستان څخه یې وباسي.

نوموړی دا خبرې په داسې مهال کوي، چې په افغانستان کې مېرمنې او نجونې د کار او زده کړو حق نه لري، د بیان پر ازادۍ بندیز لګېدلی، لسګونه مدني فعالان بندیان دي او همدا راز د ملګرو ملتونو په وروستي راپور کې ویل شوي، چې طالبانو د پخواني حکومت سلګونه غړي، شکنجه کړي، زنداني کړي او حتا وژلي یې دي.