طالبان: په تېرو څلورو ورځو کې د افغان کډوالو ۹۰۰ کورنۍ افغانستان ته راستنې شوې
د طالبانو تر واک لاندې باختر خبري اژانس راپور ورکوي، چې په تېرو څلورو ورځو کې د افغان کډوالو ۹۰۰ کورنۍ د تورخم له لارې افغانستان ته راستنې شوې دي. ويل کيږي د ورځې تر سلو زیاتې کډې له پاکستانه افغانستان ته راستنیږي.
په تورخم دروازه کې د لیږد مسول، آمر بخت جمال ګوهر وايي، «هره ورځ تر ۱۵۰ کورنۍ افغان کډوال د تورخم له لارې افغانستان ته ستنیږي.»
نوموړی وايي، له پاکستان څخه راستنېدونکي کډوال، د کډوالو نړیوال سازمان او نورو مرستندویه بنسټونو ته د مرستي لپاره ورپیژني.
نوموړی وايي: « ډیری کورنۍ په خپله خوښه افغانستان ته ستنیږي، دلته موږ د زده کړو، تذکرې جوړولو او د ژوندانه نورې اسانتیاوې هم ورته برابرو.»
پر ډیورنډ کرښه تورخم کې طالب چارواکي پر داسې مهال له پاکستانه د کډوالو د راستنېدو خبر ورکوي، چې په دې ورستیو کې د پاکستان حکومت د افغان کډوالو پر وړاندې سخت دریځي زیاته کړي او ټنیګار کوي چې ناقانونه کډوال به له پاکستانه باسي.
