د بشري حقونو ډلو د مهسا امیني د مړینې د کلیزې په پار، د امنیتي وضعیت له سختولو خبر ورکړ
په ایران کې د بشري حقونو ډلې وايي، د مهسا د مړینې د لومړي تلین په درشل کې په کردستان او د ایران په یو شمېر نورو ښارونو کې امنیتي تابیاوې سختې شوې دي.
د سېپټمبر په ۱۶مه د تهران د ارشاد ګزمې په توقیف کې د مهسا امیني مړینې د اسلامي جمهوریت پر وړاندې یو له سترو لاریونو څخه و، چې د اعتراضونو تاریخ یې جوړ کړ.
په دغو لاریونونو کې چې څو میاشتې یې دوام وکړ، اعتراض کوونکو په ایران کې د څه باندې څلورو لسیزو د واکمنۍ د ختمولو غوښتنه وکړه.
دغه لاریونونه چې د پولیسو لهخوا وځپل شول، لاریون کوونکو ته یې درنه مرګژوبله هم واړوله.
د بشري حقونو د ډلو په وینا، د ۷۱ کم عمره لاریون کوونکو په ګډون تر ۵۰۰ ډېر کسان وژل شوي، سلګونه نور ټپیان شوي او زرګونه کسان نیول شوي دي.
د مهسا په زېږنځای کې سختې امنیتي تابیاوې نیول شوي او په ایران کې د بشري حقونو یوه فعال په لویدیځ کردستان ولایت کې د امیني هستوګنځای ته په اشارې سره رویټرز ته ویلي، چې په سقز کې د امنیتي ځواکونو قوي حضور شتون لري.
يوه بل فعال هم وويل، چې د لاريون کوونکو يوې وړې ډلې د حکومت ضد شعارونه ورکول.
د ټولنیزو رسنیو کې ډېر شمېر کاروونکو هم په څو ښارونو په ځانګړې توګه د کردستان په ولایت کې د امنیتي ځواکونو د ځای پرځای کولو خبر ورکړی دی.
رویټرز راپور ورکړی، چې سمدستي دغه مالومات تاییدولی نهشي.
په ناروې کې د بشري حقونو یوې ډلې د یوې بیانیې په خپرولو سره ویلی، چې د ایران په لوېدیځ کې څو کرد مېشتو ښارونو په وروستیو ورځو کې د ویرې او جنګي حالت غوره کړی و.
اسلامي جمهوريت امریکا، اسرائيل او د هغوي سيمهییز اجنټان تورن کړل چې له ناکراريو په ملاتړ سره د ايران د بې ثباته کولو په لټه کې دي.
