ځايي سرچينې: طالبانو په غور ولایت کې د یوې مرستندویه موسسې ۱۸ کارکوونکي نیولي
د غور ولایت ځایي سرچینو افغانستان انټرنشنل ته ویلي، چې طالبانو د دغه ولایت په لعل او سرجنګل ولسوالیو کې د «یوې مرستندویه موسسې»۱۸ کارکوونکي نیولي دي. د سرچينې د معلوماتو له مخې؛ په نيول شويو کسانو کې د يوه «امريکايي » په ګډون اوه ښځې هم شاملې دي.
د سرچينې د معلوماتو له مخې؛ په نيول شويو کسانو کې د يوه «امريکايي » په ګډون اوه ښځې هم شاملې دي.
دغه امريکايي تبعه او دوه نور کسان د سې شنبې په ورځ (د وږي ۱۴مه) او د شپږو ښځو په ګډون ١٥ تنه نور د چهارشنبې په ورځ (د وږي ۲۲مه) نيول شوي دي.
ځایي سرچینو ویلي، چې نیول شوي کسان د نړۍوال مرستندویه ماموریت (IAM) په نوم د یوې موسسې کارکوونکي وو.
د راپورونو له مخې په غور ولایت کې د دې ادارې دفتر دا مهال تړل شوی دی.
دا نه ده معلومه چې دغه کسان په کوم تور نیول شوي او د نړۍوال مرستندویه ماموریت (IAM) او طالبانو تر اوسه په دې اړه څه نه دي ویلي.
د دې موسسې په ویب پاڼه کې راغلي: «موږ د روغتیا او پراختیا په برخو کې د ظرفیت لوړولو لپاره کار کوو». دې موسسې په ویب پاڼه کې زیاته کړې، چې د سترګو د پاملرنې، د ټولنې پراختیا، روغتیا او تعلیمي پروژو کې فعالیت کوي.
