د صنعت او سوداګرۍ کمېټه: د تورخم دروازې په تړلو سوداګرو ته میلیونونه ډالر زیان اوښتی
د پاکستان او افغانستان د سودا ګرۍ او صنعت ګډه کمېټه وایي، په تېرو اتو ورځو کې چې د تورخم دروازه تړل شوې، د دواړو غاړو سوداګرو ته میلیونونه ډالر زيان اوښتی دی.
د دغې کمېټې لهخوا په خپره شوې خبر پاڼه کې راغلي، چې د کرښې دواړو غاړو ته په خوراکي توکو بار لارۍ ایسارې دي او تر ډېره دغه توکي خوسا شوي هم دي.
د لنډي کوتل مرستیال کمېشنر ارشاد مومند {د سپټمبر په ۱۳نیټه} رسنیو ته ویلي، چې نن په اتمه ورځ هم د تورخم دروازه تړلې پاتې ده او د خلاصېدو په اړه یې کوم پرمختګ نهدی شوی.
په تېره یوه اونۍ کې د پاکستان پوځي چارواکو او طالبانو ترمنځ د تورخم دروازې د خلاصولو په تړاو دوه ځلې خبرې شوې؛ خو پرته له کومې پایلې پای ته رسېدلې دي.
له پېښوره تر تورخمه پر غځېدلې لار هم د خوراکي او نورو سوداګریزو توکو بار لاریو کتارونه ولاړ دي، چې د تورخم دروازې د بیا پرانېستې لپاره شیبې شماري، تر څنګ هغه افغانان چې ګڼ یې د درملنې لپاره پاکستان ته راغلي وو، هم غواړي خپل هېواد ته ستانه شي چې د لارې له بندېدو سره د هغوی ستونزې هم زیاتې شوې دي.
د تورخم دروازه اته ورځې وړاندې د سېپټمبر په ۶ مه نېټه له هغې وسلهوالې نښتې وروسته وتړل شوه، چې د پاکستاني پوله ساتو او طالبانو تر منځ پېښه شوه. په دغه وسلهواله نښته کې د دوو طالبانو په ګډون درې تنه وژل شوي وو.
