کاکړ: سعودي عربستان به راتلونکو پنځو کلونو کې په پاکستان کې ۲۵ میلیارده ډالر پانګونه وکړي
د پاکستان موقت لومړي وزیر انوارالحق کاکړ د دغه مطلب په څرګندولو سره زیاته کړه، چې سعودي عربستان به په راتلونکو دوو تر پنځو کلونو کې په پاکستان کې ۲۵ میلیارده ډالر پانګونه وکړي. دغه پانګونې به د کانونو، کرنې او مالوماتي ټکنالوژۍ په برخو کې وي.
کاکړ د پاکستان د نه سپړل شویو کاني زېرمو ارزښت شاوخوا شپږ ټرېلیونه ډالر اعلان کړی دی.
که څه هم نوموړي هغه پروژې په ډاګه نه کړې، چې سعودي عربستان به په کې پانګونه وکړي؛ خو د کاناډا د کانونو او فلزاتو یوه شرکت برېک ګولډ کورپ تېره میاشت اعلان وکړ چې دوی غواړي د سعودي د پانګونې دولتي صندوق په پاکستان کې د سرو زرو او مسو کان کېندنې په پروژې «ریکو ډک» کې شریک شي.
برېک ګولډ، دغه کان په نړۍ کې د مسو او سرو زرو تر ټولو لوی نا پرمختللی کان ګڼي، چې پنځوس سلنه برخه یې د دوی په لاس کې ده او پاتې پنځوس سلنه نوره برخه یې د پاکستان د حکومت او بلوچستان ایالت سره تړلې ده.
د سعودي عربستان د دغه پنځه ویشت میلیارډ دالري پانګونې تصویبېدل به له هېواده بهر د سعودي عربستان د سلطنت ترټولو لویه پانګونه وي.
کاکړ دا هم وویل، چې حکومت یې هڅه کوي په راتلونکو شپږو میاشتو کې د برېښنا سکټور د دولتي واحدونو د خصوصي کولو دوه تړونونه بشپړ کړي.
هغه زياته کړه، چې هڅه کوي د انرژۍ له سکټور څخه بهر يو بل دولتي شرکت هم خصوصي کړي.
د پاکستان دولتي شرکتونه د مالي ستونزو له امله د حکومت د اوږدمهاله اندېښنو څخه دي.
په دې وروستیو کې پاکستان د دغه هېواد نړۍوال هوايي شرکتونه بیاځلې د خصوصي کولو په نوملړ کې شامل کړل.
پاکستان د پېسو له نړۍوال صندوق څخه د درې ملیارده ډالرو پور له ترلاسه کولو وروسته، د خپل اقتصاد د بیا رغېدو لپاره ستونزمنه او پېچلې لار غوره کړې ده.
