د تاجېکستان په بارانونو او سیلابونو کې ۱۹ کسان مړه شوي او ۷ نور ورک دي
تاجېکستاني رسنۍ خبر ورکوي، چې د تاجېکستان په وروستیو اورښتونو، سېلابونو او د ځمکې ښویېدنې په پېښو کې د وژل شویو کسانو شمېره ۱۹ تنو ته ورسېده او ۷ نور چې دوه یې کوچني ماشومان دي ورک شوي دي.
د تاجېکستان د بېړنیو پېښو کمېټه وايي، چې تر دا مهاله له کافرنهان سیند څخه شپږ جسدونه تر لاسه کړي، چې دوه یې ماشومان او څلور یې مېرمنې دي.
دوی زیاتوي، چې د پلټنې او ژغورنې ډلې په نورو ورکو شویو کسانو پسې لټه کوي او ښايي د مړو شمېره له دې هم پورته شي، تر دا مهاله په سیمه کې د پلټنې او ژغورنې عملیات روان دي.
دغه بارانونه د پلازمېنې دوشنبې په وحدت، تاجېک اباد، ورزوب او رودکي سیمو کې شوي، چې ګڼې کورنۍ یې بې کوره کړي دي، سړکونه او پلونه یې ویجاړ کړي دي.
تېره ورځ د تاجېکستان ولسمشر امام علي رحمان په یوې خبرپاڼې کې د ۱۳ کسانو د وژلو د خبر تر څنګ له بې ځایه شویو کورنیو سره د مرستې خبره کړې وه.
د یادونې وړ ده، چې په دې وروستیو کې موسمي بارانونو او سېلابونو د نړۍ په ګڼو هېوادونو کې مالي او ځاني زیانونه اړولي دي.
