د امریکا په کالیفورنیا ایالت کې د طوفانونو له امله ښوونځي او واټونه تړل شوي
راپورنه وايي، چې د امریکا په کالیفورنیا ایالت کې د سختو بارانونو او طوفان له امله سړکونه، دوکانونه او ښوونځي تړل شوي دي او په دغه ایالت کې بېړنی حالت اعلان شوی دی.
د دغه ایالت والي ګاوین نیوسام نن دوشنبه (د زمري۳۰مه) رسنیو ته وویل، چې په بېلابېلو سیمو کې سخت بارانونه شوي او دوی بېړنی حالت اعلان کړی دی.
نوموړي په کلفرونیا ایالت کې د شدیدې زلزلې یادونه هم وکړه او وايي، چې تر سبا پورې به د کلفرونیا یو شمېر ښوونځي هم تړلي وي.
د هوا پېژندنې اداره د دغه طوفان چټکوالی څلورمه کټګوري حسابوي او وايي، چې دا طوفان له مکسیکو څخه راتېر شوی او په چټکوالي کې یې یو څه کموالی هم راغلی دی.
دغه اداره اټکل کوي، چې یاد طوفان به یو شمېر نورو ایالتونو ته هم ورسیږي.
د یادونې وړ ده، چې په دې وروستیو کې د امریکا د سمندري طوفانونو د څار ملي مرکز ویلي، چې د دغه هېواد په سویل لویدیځو برخو کې د سیلابونو د راوتلو امکان شته.
