د افغانستان انټرنشنل لومړنۍ پښتو تلوېزوني خپرونه پیل شوه

د افغانستان انټرنشنل دا لومړنۍ تلوېزوني خپرونه سپړنه د خپلواکۍ د ۱۰۴ کلیزې په ورځ همدې تاریخي مناسبت ته ځانګړې شوې ده. په دې خپرونه کې له کارپوهانو سره د شاه امان الله غازي دورې ته کتنه شوې، چې پکې یې د افغانستان عصري کولو او متمدنولو لپاره چټک ګامونه پورته کړل.

له کوربه نویده خوشبو سره په دې پښتو لومړنۍ خپرونه کې افغان تاریخپوه او څېړونکی استاد حبیب الله رفیع، لیکوال شهسوار سنګروال او لیکوالې او شاعرې شفیقه خپلواک ګډون کړی دی.

دوی د شاه امان الله غازي پر اقتصادي پلانونونو او ټولنیزو سمونونو غږېدلي او دا یې شاربلې چې ولې د نوموړي زرینه دوره له منځه لاړه او په وطن مین پاچا جلا وطنۍ ته اړ شو.

شاه امان الله غازي د ۱۹۱۹ کال د اګسټ پر ۱۹ افغانستان خپلواک کړ، خو پر ۱۹۲۹ کال یې د سقاو یا حبیب الله کلکاني په مشرۍ بلواګرو واکمني وپرځوله.