د پاکستان پوځ: په باجوړ کې یو سرتېری او څلور وسلوال ووژل شول
د پاکستان د پوځ عامه اړیکو دفتر وایي، د خیبر پښتونخوا په باجوړ کې د عملیاتو پر مهال یو سرتېری او څلور وسلوال وژل شوي او یو وسلوال نیول شوی دي. پوځ نن ویلي، د استخباراتي معلوماتو له مخې امنیتي ځواکونو د باجوړ په چارمنګ کې دا عملیات کړي دي او ولس ته پکې مرګ ژوبله نه ده اوښتې.
د ایکسپرېس ټریبیون د راپور له مخې، پاکستاني پوځ په دې عملیاتو کې، وسلې، مهمات، بمونه او د ځانمرګو واسکټونه هم نیولي دي.
د پاکستان په باجوړ کې پوځ د عملیاتو خبره په داسې مهال کوي، چې په دې وروستیو کې په دغه سیمه کې د وسلوالو بریدونه هم ډېر شوي دي.
څلور ورځې مخکې هم د پاکستان حکومت ومنله چې په دې ولسوالۍ کې د پولیسو پر ګزمې موټر د ځانمرګي برید له امله دو سرتېري او پنځه ولسي وګړي ټپیان شوي دي.
نږدې دوه اونۍ وړاندې هم باجوړ کې د مولانا فضل الرحمن ګوند پر غونډه په ځانمرګي برید کې شاوخوا ۶۳ تنه وژل شوي او ۲۰۰ نور ټپیان شول.
د دې برید مسوولیت داعش – خراسان څانګې پر غاړه اخیستی وه.
