بلوچستان کې محکمې علي وزیر بېرته پولیسو ته سپارلی
د پښتون ژغورنې غورځنګ جګپوړی غړی او د پاکستان په پارلمان کې د وزیرستان مخکینی استازی علي وزیر په بلوچستان کې محکمې ته له وړاندې کېدو وروسته یوځل بیا د اوو ورځو لپاره بېرته پولیسو ته سپارل شوی.
علي وزیر د ۲۰۲۴ کال د اګست پر درېیمه په اسلام اباد کې ونیول شو او تر اوسه د پنجاب او بلوچستان په بېلابېلو زندانونو کې ساتل کیږي.
د علي وزیر یو نږدې همکار او موټرچلوونکی بادشاه پشتین وايي، چې علي وزیر لس ورځې مخکې د بلوچستان لسبیله ولسوالۍ ته لېږدول شوی او په پټه محکمې ته وړاندې کړای شوی و، خو محکمې بېرته د اوو ورځو پلټنو او ګروېږنو لپاره پولیسو ته سپارلی دی.
نوموړی وايي، چې علي وزیر په دې ولسوالۍ کې دوه ځله محکمې ته وړاندې شوی، خو د قضیې له اورېدو وروسته بېرته پولیسو ته سپارل شوی.
نوموړي د علي وزیر له قوله ویلي چې « د پنجاب په جيلونو کې یې دوايي او د صحت يو شی هم نه راکولو، ډير تکليفونه يي راکړي، د ظلم او جبر ټولې حربې يې استعمال کړې خو ما يوه خبره ورته کوله چې زه به د قام او وطن خبره تر مرګه پورې کوم او يو قدم به هم نه پر شا کېږم».
علي وزیر د پښتون ژغورنې غورځنګ جګپوړی غړی دی چې په تېرو څو کلونو کې دا څویم ځل دی چې زنداني کیږي.
پر هغه تور دی چې د حکومت خلاف پاروونکې ویناوې کوي او امنیتي ادارې بدناموي.
