حقاني: د طالبانو یو پلاوی د افغان کډوالو د ستونزو د ارزونې او حل لپاره ایران ته ځي

د طالبانو د کډوالو چارو وزیر خلیل الرحمن حقاني له ایرانه غوښتي چې د افغان کډوالو د ملکیتونو له ضبطولو او د هغوی له ځورولو ډډه وکړي. هغه د یکشنبې په ورځ وویل، چې د طالبانو یو لوړ پوړی پلاوی به له ایراني چارواکو سره د کډوالو د ستونزو د ارزولو او حلولو په اړه خبرې وکړي.

د طالبانو د کډوالو چارو وزارت د یکشنبې په ورځ په یوه خبرپاڼه کې ویلي، چې حقاني دغه څرګندونې په ایران کې د طالبانو له سفیر فضل محمد حقاني سره په کتنه کې وکړې. په دې کتنه کې د طالبانو سفير د طالبانو له وزير سره په ايران کې د افغان کډوالو د زياتیدونکو ستونزو په اړه خبرې کړي.

خلیل الرحمن حقاني وايي، چې طالبان غواړي د ایران له حکومت سره د خبرو له لارې د کډوالو ستونزې هوارې کړي.

هغه زیاته کړه: "موږ هڅه کوو چې د اسلامي امارت یو لوړ پوړی پلاوی د ایران له حکومت سره ناستې وکړي، ترڅو دغه ستونزې په جدي توګه تعقیب او حل شي."

نوموړي هېواد ته د افغانانو په باعزته راستنېدو د ټينګار ترڅنګ د ايران له حکومت څخه وغوښتل چې د افغان کډوالو د شتمنيو له ضبطولو ډډه وکړي او د هغوى له ځورولو لاس واخلي.

ایراني چارواکو ویلي، چې د میلیونونو افغان کډوالو ایستل د دغه هیواد یو له مهمو پلانونو څخه دی. ایران د کډوالو په اړه د طالبانو د چارواکو د داوطلبانه راستنیدو غوښتنه له پامه غورځولې ده.

په وروستیو میاشتو کې زرګونه افغان کډوال له ایرانه ایستل شوي دي. په ایران کې یو شمېر افغان کډوالو ته د کار ، د کورونو د کرایه کولو او ان په ښار کې د لیدل کیدو اجازه نه ورکول کیږي. ایراني چارواکو خبرداری ورکړی، چې هغه کمپنۍ به مجازات شي چې افغان کډوالو ته کار ورکوي.