د روسیې د بهرنیو چارو وزارت وايي، د طالبانو د رسمیت پېژندلو خبرې له وخت مخکې دي
د روسیې د بهرنیو چارو وزارت مرستیال اندري روډنکو ویلي، چې د طالبانو د رسمیت پېژندلو په اړه خبرې له وخت مخکې دي. هغه ویلي، چې د روسیې د ترهګرو ډلو له نوملړه د طالبانو د نوم ایستل کېدای شي په بېلابېلو برخو په ځانګړې توګه په اقتصادي مسایلو کې د جوړجاړي لپاره یو ګام وي.
اندري روډنکو وايي، طالبانو په درېيو کلونو کې د روسيې په ګډون د سيمې له هېوادونو سره د رغنده اړيکو د پراختيا لپاره خپله ژمنه څرګنده کړې ده.
هغه زیاته کړه: «موږ د داعش د خراسان څانګې پر وړاندې د مبارزې، په افغانستان کې د نورو ترهګرو ډلو د مهارلو او د نشهیي توکو د له منځه وړلو لپاره د هغوی د هڅو شاهدان یو.»
روډنکو وړاندې وویل: «روسیې یې په بدل کې له طالبانو سره د ګټو په مسلو کې د جوړجاړي د رامنځته کولو لپاره ګامونه اخلي.»
د روسیې د بهرنیو چارو وزارت مرستیال څرګنده کړه: «طالبانو روسي پانګوالو ته بلنه ورکړې چې د ډېرو مهمو اقتصادي پروژو په تطبیق کې برخه واخلي.»
اندري روډنکو د ۱۴۰۳په تله میاشت کې د روسیې د ترهګرو ډلو له نوملړه د طالبانو د ایستلو په اړه وویل: «دا بهیر چټک نه دی، ځکه د روسیې په قوانینو کې بدلون ته اړتیا ده.»
د افغانستان لپاره د روسیې ځانګړي استازي ضمیر کابلوف د ۱۴۰۳ کال په غبرګولي میاشت کې ویلي و چې د روسیې له خوا د ترهګرو سازمانونو له نوملړه د طالبانو د ایستلو وړاندیز د وروستۍ پرېکړې لپاره ولادیمیر پوتین ته سپارل شوی دی. ضمیر کابلوف وویل، د طالبانو په اړه لا هم ستونزې شته او له حل وروسته به یې په اړه پریکړه وشي.
د ۱۴۰۳ کال د غبرګولي میاشتې په اتمه نیټه د روسیې ولسمشر ولادیمیر پوتین تاشکند ته د خپل سفر په ترڅ کې خبریالانو ته وویل چې له طالبانو سره یې څنګه اړیکې ټینګې کړې، بله پوښتنه ده، خو موږ باید له هغوی سره په یو ډول اړیکې ولرو.
پوتین له طالبانو سره د اړیکو په اړه د منځنۍ اسیا په ګډون له سیمه ییزو شریکانو سره مشورې ته اشاره وکړه او ویې ویل: «موږ د خپل هر شریک او ملګري نظرونه په پام کې نیسو او په دې برخه کې به همغږي کوو.»
