د میمنې_شبرغان په لویه لاره په دوو جلا ټرافیکي پېښو کې پنځه تنه مړه شوي دي
د طالبانو تر واک لاندې باختر اژانس خبر ورکړی، چې د میمنې_شبرغان پر لویه لاره په دوو جلا ټرافیکي پېښو کې پنځه تنه مړه شوي او نهه نور ټپیان دي.
دغه اژانس پر اېکس پاڼه په فاریاب ولایت کې د طالبانو د اطلاعاتو او فرهنګ رییس شمس الدین محمدي له خولې لیکلي، چې دغه پېښې تېره ورځ ناوخته شوې دي.
د هغه په وینا، په دواړو پېښو کې موټرونه بې واکه شوي او له امله یې دغه پېښې رامنځته شوې دي.
طالبانو په وار، وار د دغه ډول پېښو لوی لاملونه د سړکونو خرابوالی او د موټر چلوونکو بې احتیاطي یاده کړې ده.
واک ته د طالبانو له رسېدو وروسته په افغانستان کې ټرافیکي پېښې ورځ تر بلې د دغه هېواد په بېلابېلو ولایتونو کې خلکو ته مرګ ژوبله اړوي.
له بل پلوه د طالبانو د ټرافیکو ریاست په کابل کې سیمهییزو رسنیو ته (د وږي په ۲۰مه) ويلي و، چې د روان لمریز کال په تېرو شپږو میاشتو کې په ټرافیکي پېښو کې ۱۲ سوه کسان مړه او تر څلورو زرو ډېر ټپیان شوي دي؛ خو د نویو پېښو په اړه بیا تازه مالومات نه دي خپاره شوي.
