یواو ګلانټ: د هاګ محکمې پرېکړه د اسراییلي وګړو وژلو ته د مشروعیت ورکولو په مانا ده
د اسراییل د دفاع پخوانی وزیر یواو ګلانټ وایي، چې د نړۍوالې محکمې د پرېکړې له مخې د اسراییل د لومړي وزیر نیول د «اسراییلي خلکو وژلو ته د مشروعیت ورکولو او پر مېرمنو، ماشومانو او بوډاګانو تېري کوونکو ته د جایزې ورکولو مانا لري.»
ګلانټ په خپله اېکس پاڼه لیکلي، چې دغه شان پرېکړې په نړۍواله کچه د ترهګرۍ په وړاندې د مبارزې پخوانۍ مخینه له ګواښ سره مخامخوي.
د نړۍوالې محکمې قاضیانو د پنجشنبې په ورځ د لېندۍ په لومړۍ نېټه د اسراییل د لومړي وزیر نتنیاهو او د هغه هېواد د دفاع د پخواني وزیر یواو ګلانټ د نیولو پرېکړه وکړه او د اسراییل د اعتراص له غوښتنې سره یې مخالفت په ډاګه کړ.
نتنیاهو او ګالانټ د هاګ محکمې د پرېکړې له مخې د «جنګي جرمونو» او «بشري جنایت» په تور تورن شوي دي.
د نتنیاهو دفتر دغه پرېکړه د «یهودانو سره دوښمني» او د دغې محکمې لهخوا لګېدلي تورونه یې «بې بنسټه او دروغجن» وبلل.
د امریکا د ملي امنیت شورا ویاند د پنجشنبې په ورځ وویل:« موږ د څارنوالۍ د دغې بېړنۍ پرېکړې له امله سخت اندېښمن شوي یو او د محکمې دغه پرېکړه یوه تېروتنه بولو.»
که څه هم چې کاناډا او اروپا له دغې پرېکړې ننګه او ملاتړ کړی؛ خو داسې ښکاري چې ښایي ډېره عملي بڼه و نه لري، ځکه چې امریکا او د هغې اصلي ملګری اسراییل لا تر اوسه د دغې نړۍوالې محکمې غړیتوب نه دی تر لاسه کړی.
