پزشکیان لوېدیځ ته: دا ډېره شرمونکې ده، چې تاسو د بشري حقونو یادونه او ملاتړ کوئ

‏د ایران ولسمشر مسعود پزشکیان لوېدیځ ته وایي، له هغه بشري حقونو چې تاسو ترې دفاع کوئ، ډېره شرمونکې ده.

نوموړي دغه څرګندونې تېره ورځ په سیستان او بلوچستان کې یوې ناسته کې د وینا پرمهال کړې دي.
هغه وایي، امریکایي او اروپایي هېوادونو ته نه ښایي له یوې خوا په غزه کې د ښځو او ماشومانو په وژنه بوخت دي او له بله پلوه بیا د بشري حقونو خبرې کوي.
هغه زیاته کړې، د هغو بشري حقونو چې تاسو یې خبرې کوئ، د شرم وړ خبره ده.
هغه د ایران خلاف د بشري حقونو ضد پرېکړه لیک په اړه وویل:« کله چې همدغه کسان زموږ پر وړاندې د بشري حقونو پرېکړه لیک صادروي، دوی د بشري حقونو خبره کوي؛ ډېره د شرم وړ خبره ده.»
ښاغلي پزشکیان وړاندې ویلي، چې اسراییلي پوځ په غزه کې ټول جنایتونه ترسره کړي دي؛ خو دوی یې پر وړاندې چوپه خوله پاتې دي او اوس زموږ پر وړاندې د بشري حقونو ادعا کوي.
هغه ویلي:« که تاسو د بشري حقونو په اړه دومره فکر کوئ؛ نو ولې په غزه کې پر هغو مظلومو خلکو بمبارۍ کېږي او تاسو یې بیا پر وړاندې هیڅ اقدام نه کوئ؟ اسراییلي پوځ د دې پرځای چې د اصلي کسانو سره مخامخ جګړه وکړي، بې ګناه ښځې او ماشومان بمباروي. د شرم وړ خبره ده، چې تاسو د اسراییلي پوځ ملاتړي یاست او بیا د بشري حقونو خبرې هم کوئ.»