پوتین وايي د اوکراین جګړه نړۍواله کیږي
ولسمشر ولادیمیر پوتین د پنجشنبې په ورځ وویل، چې د اوکراین جګړه وروسته له هغې د نړۍوالې شخړې په لور روانه شوې، چې امریکا او بریتانیا اوکراین ته اجازه ورکړه چې د دوی له خوا د ورکړل شوو توغندیو پر مت په روسیه کې دننه بریدونه وکړي.
هغه خبرداری ورکړ چې مسکو به ځوابي برید ترسره کړي.
پوتین وویل، چې روسیې د امریکا او بریتانیا د توغندیو د کارونې په ځواب کې د اوکراین پر یوه پوځي اډه د نوي ډول هایپرسونیک منځني واټن ویشتونکو بالستیک توغندي برید کړی. پوتین خبرداری ورکړ چې نور بریدونه به هم ترسره کړي. هغه وویل، چې ملکي خلکو ته به د ورته وسلو له نورو بریدونو مخکې خبرداری ورکړل شي.
پوتین وویل، د ولسمشر جو بایډن د ادارې له پریکړې وروسته، اوکراین د نوامبر په ۱۹مه پر روسیې د امریکا او بریتانیا له خوا د جوړو شوو توغندیو بریدونه کړي په همدې حال کې، اوکراین بیا د نومبر په ۲۱ مه د امریکايي توغندیو پر مټ یو بل برید هم ترسره کړی دی.
پوتین د روسیې له دولتي ټلویزیون څخه ملت ته په وینا کې وویل: "د اوکراین له برید وروسته، لکه څنګه چې موږ په وار وار ټینګار کړی، په اوکراین کې سیمه ییزه شخړه چې مخکې د لویدیځ لخوا هڅول شوې وه، اوس یې د نړیوالې جګړې ځانګړتیاوې خپلې کړي دي.”
پوتین وویل، متحده ایالات نړۍ د یوې نړۍوالې جګړې پر لور وړي.
هغه وویل: "د تیري کونکو د کړنو د زیاتوالي په صورت کې، موږ به په قاطع ډول ځواب ووایو."
پوتین وویل، چې دلودیځو اوږد واټن ویشتونکو توغندو بریدونو روسیې ته کوم جدي زیان نه دی اړولی.
پوتین وویل: «موږ د هغو هېوادونو د پوځي تاسیساتو پر ضد د خپلو وسلو د کارولو حق لرو چې اجازه ورکوي چې زموږ د تاسیساتو پر ضد اوکراین د هغوی وسلې وکاروي.»
