طالبانو د ماینونو او ناچاودو توکو د شنډولو پر چټکتیا ټینګار کړی
د طالبانو تر واک لاندې له پېښو سره د مبارزې د چمتووالي ملي ادارې د ماینونو او ناچاودو توکو د شنډولو پر چټکتیا ټینګار کړی.
د دغې ادارې مشر نورالدین ترابي د سې شنبه په ورځ (د لړم ۲۹مه)د ماین پاکۍ له نړۍوالو او کورنیو موسسو له مسولینو سره په لیدنه کې د ماینونو او ناچاودو توکو د شنډولو پر چټکتیا ټینګار کړی دی.
د طالبانو تر کنټرول لاندې د ملي ټلویزیون د راپور له مخې، ترابي ویلي چې په افغانستان کې اوسنی امنیتي وضعیت د ماین پاکۍ لپاره مناسب وخت دی.
د راپور له مخې، د موسسو مسولینو له ښاغلي ترابي څخه ځینې غوښتنې هم کړي خو د غوښتنو په اړه یې وضاحت نه دی ورکړی.
دا په داسې حال کې ده، چې تر دې مخکې په افغانستان کې د ماین پاکۍ موسسو یو شمېر مسوولینو ویلي وو، چې د ماین پاکۍ موسسې د بودیجې له کمښت سره مخ دي او نړۍوال باید په دې برخه کې له موسسو سره مرستې وکړي.
طالبانو په ځلونو ویلي، چې د ماینونو د پاکولو بهیر بشردوستانه او غیر سیاسي بهیر دی او نړۍ باید په افغانستان کې د ماینونو د بشپړ پاکولو په برخه کې خپل مسوولیت ترسره کړي.
په افغانستان کې د ماینونو او د پخوانیو پاتې شویو ناچاودو توکو د چاودنې ډېری قربانیان افغان ماشومان دي.
اوچا هم په خپلو راپورونو کې ویلي، چې لا هم د افغانستان ۱،۲ مېلیونه متر مربع ځمکه پر ماینونو او چاودېدونکو توکو ککړه ده.
