یونېسف: د خوارځواکۍ د پېژندلو لپاره مو د څه باندې یو میلیون افغان ماشومانو معاینه کړې

د ملګرو ملتونو د ماشومانو د ملاتړ صندوق ویلي، چې د سپټمبر په میاشت کې یې په افغانستان کې له یو میلیون ډیر ماشومان د خوارځواکۍ له امله معاینه کړي دي. یونېسف ټینګار کړی چې دغه ازموینې د خوارځواکۍ تر ګواښ لاندې ماشومانو د پیژندلو لپاره لومړی ګام دی.

د ملګرو ملتونو د ماشومانو د ملاتړ صندوق یونېسف نن دوشنبه د (لړم ۲۸مه) لیکلي، چې یوازې د سپټمبر په میاشت کې یې په افغانستان کې له یو میلیون ډیر ماشومان د خوارځواکۍ له امله معاینه کړي دي.

دغه سازمان دا نه دي ویلي، چې په دغو څه باندې یو میلیون ماشومانو کې څومره شمېر یې په سخته خوارځواکۍ اخته دي.

خو د ملګرو ملتونو د ماشومانو د ملاتړ صندوق په خپل وروستي راپور کې ویلي وو، چې سږ کال ۳۴۳ زره ماشومان په سخته خوارځواکۍ د افغانستان روغتونونو ته د درملنې لپاره استول شوي دي.

تر دې مخکې د روغتیا نړۍوال سازمان ویلي و چې په افغانستان کې د خوراکي توکو ناامني په مخ پر زیاتیدونکي ناورین بدله شوې او ۲.۹ میلیونه ماشومان چې عمرونه یې له پنځو کلونو کم دي په خوارځواکۍ اخته دي.

نړۍوال سازمانونه وايي، چې په افغانستان کې د بې وزلۍ او لوږې د پراخېدو له امله د هغو ماشومانو شمېر ډېرېږي، چې د خوارځواکۍ له ګواښ سره مخ دي.