د جرمني په بن ښار کې د افغانستان جنرال کونسل له خپلې دندې استعفا وکړه
د جرمني په بن ښار کې د افغانستان کونسلګرۍ د یوې خبرپاڼې په خپرولو سره د کونسل سید لطیف الله سادات په حواله لیکلي چې په بن کې د جنرال کونسل په توګه له خپلې دندې ګوښه کیږي. سادات وايي، له یوې مودې راهیسې ددې سیاسي استازولۍ مسلکي دندې د سیاسي دلایلو له امله خنډونه سره مخ شوې دي.
په جرمني کې د افغانستان جنرال کونسلګرۍ نن دوشنبه «د لړم۲۸مه» په خواله رسنۍ فېسبوک کې د جنرال کونسل سید لطیف الله سادات په حواله یوه خبرپاڼه خپره کړې ده.
په دې خپرپاڼه کې لیکل شوي چې:«د شته ستونزو د دوام د مخنیوي او د کوربه هېواد د سیاسي ملحوظاتو او محدودیتونو او غوښتنې په پام کې نیولو سره زه چې د افغانستان په ډېپلوماتیکه دستګاه کې د ۲۳ کلونو خدمت ویاړ لرم، په جرمني کې د افغانستان اسلامي جمهوریت د جنرال قونسل په توګه له خپلې دندې ګوښه کیږم.»
په دې خبرپاڼه کې د کوربه هېواد جرمني سیاسي ملحوظات او محدودیتونه نه دي روښانه شوي.
افغان جنرال کونسل په دې خبرپاڼه کې یوازې دومره یادونه کړې ده چې له یوې مودې راهیسې د دې استازولۍ مسلکي دندې په ځانګړې توګه د سیاسي، دلایلو له امله له خنډونو سره مخ شوې دي.
په خبرپاڼه کې لیکل شوي چې په جرمني کې د افغانستان د نمایندګیو بانکي حسابونه، تادیات او لګښتونه د وروستیو تحولاتو له لومړۍ اونۍ څخه تر اوسه د کوربه د اړونده ادارو تر مستقیم څار لاندې دي.
سید لطیف الله سادات چې د افغانستان په بهرنیو چارو وزارت کې ۲۳ کلنه کاري سابقه لري وايي، د لومړي درجه مسوول په توګه د خپلی ټاکني له لومړۍ نیټې نه د خپلو رسمي کړنو او چارو څخه په پوره شفافیت د حساب ورکولو لپاره چمتو دی.
خو سادات په دې خبرپاڼه کې نه دي ویلي چې ایا بن کونسلګري به خپل کار ته ادامه ورکوي او یا هم وبه تړل شي.
له دې وړاندې د افغانستان انټرنشنل یوه ځانګړي راپور کې موندلې وه، چې د طالبانو بهرنیو چارو وزارت په جرمني کې د افغانستان له سفارت او بن کونسلګرۍ سره تعامل ددې دوو ډپلوماتیکو استازځایونو د لومړۍ درجه مسوولانو په ګوښه کېدو پورې مشروط کړی.
د یاد وزارت یوې سرچینې افغانستان انټرنشنل-پښتو ته وویل، چې په برلین کې د افغانستان سفارت او د بن کونسلګرۍ ته کافي وخت ورکړل شوی و، چې د طالبانو د بهرنیو چارو له وزارت سره په تعامل چارې پرمخ بوځي، خو دوی دې چارې ته حاضر نه شول او اوس چې حاضر دي، طالبان یې نه مني.
