طالبانو په کابل او پکتيکا کې ۵ کسان د «لواطت او نامشروع اړيکو» په تور نيولي
د طالبانو سترې محکمې ويلي، چې په پکتيکا کې يې درې کسان د «لواطت په تور» په عام محضر کې ۳۰ – ۳۰ دورې وهلي او په کابل کې بیا امربالمعرف یوه ښځه او یو نارينه د «نامشروع اړیکو» په تور نيولي دي. د امربالمعروف نوي قانون د نارينه او ښځې خبري «غيرې اخلاقي» ګڼي.
د طالبانو سترې محکمې د دوشنبې په ورځ په يوې خبرپاڼه کې ويلي، چې د دوی ابتداييه محکمې د پکتيکا د سرروضې ولسوالۍ کې درې کسان د «لواطت په تور» د ۳۰ دورو وهلو ترڅنګ هر یو په ۱۵ – ۱۵ کاله تنفيذي بند محکوم کړي.
د طالبانو د امربالمعروف وزارت وايي، چې د دوی محتسبانو د کابل ښار په پنځمه امنيتي حوزه کې یوه ښځه او یو نارينه د «ناشروع» یا د واده پرته اړيکې په تور تر نیولو وروسته قضايي ادارو ته سپارلي دي.
طالبانو د دغو کسانو د هویت په اړه څه نه دي ويلي.
د طالبانو محتسبان په ټول هیواد کې د دې ډلې د امربالمعروف قانون پر بنسټ د نارینه او ښځو نیولو ته دوام ورکړی او په بېلابيلو ولایتونو کې يې یو شمېر ښځې او نارينه نیولي او زنداني کړي دي.
د طالبانو امربالمعروف د وزارت له خوا د نیول شویو کسانو لپاره سختې سزاګانې ټاکل شوي.
دغه کسان معمولا په عام محضر کې په دُرو وهلي کيږي او يا د طالبانو زندانونو ته استول کيږي.
که څه هم د طالبانو د امربالمعروف وزارت په دې اړه مشخص جزییات نه ورکوي، چې مجازات څنګه پلي کوي؛ خو د دې ډلې ستره محکمه نږدې هره ورځ خلک د اخلاقي فساد او له واده څخه بهر د اړیکو په تور په عام محضر کې وهي.
