طالبانو په بغلان کې له څه باندې زرو ښوونکو څخه د «امارت پېژندنې کتاب» ازموینه واخیسته
د طالبانو تر واک لاندې باختر اژانس وايي، چې په بغلان کې د طالبانو د پوهنې چارواکو له څه باندې زرو ښوونکو د «امارت پېژندنې» له کتابه ازموینه اخیستې ده. تر دې مخکې به طالبانو له زدهکوونکو او محصلانو داسې ازموینې اخییستې.
باختر اژانس د طالبانو له قوله ويلي، چې لسو ګټونکو کسانو ته به جایزې هم ورکړي.
د طالبانو تر واک لاندې باختر اژانسنن یکشنبه د (لړم ۲۷مه) په ایکس پاڼه د بغلان د پوهنې چارواکو له قوله ویلي، چې په بغلان کې د طالبانو د پوهنې چارواکو له څه باندې زرو ښوونکو څخه د «امارت پېژندنې» له کتابه ازموینه اخیستې ده.
طالبان وایي، چې د دې سیالۍ يې موخه په «ټولنه کې فکري اصلاح، روزنه او د امارت اړوند د خلکو د معلومات زياتول دي.»
طالبانو له دغې ډلې ښوونکو څخه د ازموینې لسو ګټونکو ښوونکو ته د «لپټاپ کمپیوټر او ګرځنده ټلیفون» ډالۍ په پام کې نیولې دي.
طالبانو تر دې وړاندې د افغانستان په ټولو ولایتونو کې له محصلانو او زدهکوونکو د «امارت پېژندنې» ازموينه اخیسته او په دې ازموینه کې برياليو زدهکوونکو ته جايزې هم ورکړې وې.
طالبان تر ازموینې مخکې په زدهکوونکو او محصلانو د«امارت پېژندنې» په نوم د طالبانو له خوا چاپ شوی کتاب ویشي او د لوستلو سپارښتنه ورته کوي چې بیا وروسته ازموینه ترې اخلي.
په دې پوښتنو کې لیدل کېږي، چې د «امارت پېژندنې»په ازموینه کې له زدهکوونکو او محصلانو څخه د طالبانو د تحریک د ایډیالوژۍ، اهدافو او تاریخ په اړه پوښتنې کېږي.
طالبانو درې ورځې وړاندې په پنجشیر کې له شمېر ځوانانو د «له لوېدیځ سره د فکري جګړې» په برخه کې هم د ازموینه اخیستې وه.
د پنجشیر د اطلاعات او فرهنګ مشر نصر الله ملک زاده ویلي و:« فکري جګړه له پوځي جګړې ډېره خطرناکه ده.»
سره له دې چې په افغانستان کې د هلکانو لپاره زده کړې تر یوه بریده په عادي توګه روانې دي، خو له هغه راهیسې، چې طالبانو د ۱۴۰۰ کال د زمري په مياشت کې د افغانستان واک تر لاسه کړ، له شپږم ټولګي پورته د نجونو پر زدهکړو یې بندیز لګولی او په دیني مدرسو کې یې د ماشومانو او تنکيو ځوانانو پر ګومارلو تمرکز زیات کړی دی.
