ریچارډ بینیټ په پکتیا کې د یو تن «قصاص» غندلی
د بشري حقونو په برخه کې د ملګرو ملتونو ځانګړي راپور ورکوونکي ریچارډ بینیټ په پکتيا کې د طالبانو له لوري د یو کس قصاص غندلی او دا ډول سزا يې له بشري حقونو سرغړونه یاده کړې. نوموړي له طالبانو غوښتي، چې ژر تر ژر ه دي دا دول وحشتناکې سزا وې ودروي.
د بشري حقونو په برخه کې د ملګرو ملتونو ځانګړي راپور ورکوونکي ریچارډ بینیټ د ګرديز په يوه لوبغالي کې د چار شنبې په ورځ (د لړم ۲۳ مه ) د یوه کس د قصاص په غبرګون کې پر خپله اېکسپاڼه د طالبانو دا او ورته نورې فزیکي سزاوې او اعدامونه غندلي دي.
نوموړي پر طالبانو ږغ کړی، چې دا ډول کړنې له بشري حقونو ښکاره سرغړونې دي.
بينيټ ليکلي: « زه پر طالبانو غږ کوم، چې ژر تر ژره دغه ظالمانه سزاګانې ودروي چې له بشري حقونو ښکاره سرغړونه ده.»
د طالبانو سترې محکمې د چارشنبې په ورځ اعلان وکړ، چې د پکتیا په مرکز ګردیز لوبغالي کې یې یو کس د دې ډلې د لوړ پوړو چارواکو په حضور کې د قصدي قتل په تور قصاص کړ.
د طالبانو سترې محکمې ويلي، چې د دې ډلې له واک ته رسیدو راهیسې یې شپږ تنه اعدام کړي دي.
طالبانو ویلي، چې د ملا هبت الله د وروستۍ پرېکړې په تمه دي، چې شاوخوا ۳۰ نورو کسانو ته هم د اعدام حکم صادر کړي.
