د مقاومت جبهه: په کابل کې مو پر طالبانو برید کې پنځه وسله وال وژلي دي

د ملي مقاومت جبهه وايي، چې په کابل کې د طالبانو د ځانګړو قطعې پر کاروان د دوی د ځواکونو په برید کې پنځه طالب وسله وال وژل شوي او څلور نور ټپیان دي. دغه جبهه وايي، چې دغه برید د پنجشنبې په ماښام د کابل د میرویس میدان په سیمه کې اریانا هوټل ته څېرمه شوی دی.

تر دې وړاندې، د کابل ښار اوسېدونکو د پنجشنبې په ورځ افغانستان انټرنېشنل ته وويل، چې د پنځمې ناحيې اړوند میرویس میدان سيمه کې يې د چاودنې غږ اوریدلی دی. دوی ویلي و، دا پېښه د کابل اریانا هوټل ته څېرمه شوې ده.

د مقاومت جبهه وايي، چې دغه پيښه د طالبانو د خاصو ولايتي قوتونو د موټرو په کاروان د دغې ډلې د بريد په پایله کې رامنځته شوې ده. د جبهې په اعلاميه کې ويل شوي، چې په دې بريد کې د طالبانو دوه موټر ويجاړ شوي او پنځه ميله وسلې د دغې جبهې د ځواکونو لاس ته ورغلي دي.

د طالبانو دغه مخالفه وسله واله ډله وايي، چې په دې بريد کې ملکي وګړو او د دغې جبهې ځواکونو ته زيان نه دى اوښتى.

طالبانو د دې پېښې په اړه څه نه دي ویلي.

د مقاومت جبهه وايي، دا په تېرو ۲۴ ساعتونو کې په کابل ښار کې د طالبانو پر وړاندې د دوی درېیم برید دی.