ازادۍ جبهه: په کاپیسا کې مو د یو برید په ترڅ کې یو طالب وژلی او دوه نور ټپیان شوي دي
د افغانستان ازادۍ جبهه وایي، چې په کاپیسا ولایت کې د دوی د یوه برید په پایله کې درېیو طالبانو ته مرګژوبله اوښتې.
دغې جبهې په اېکس پاڼه د دغه برید د ویډیو په خپرولو سره لیکلي، چې تېرماښام (د لړم ۸مه) د دوی «جنګیالیو» د طالبانو د حصه اول کوهستان ولسوالۍ د امنیه قوماندانۍ یو رینجر په نښه کړی دی.
په دغې لیکنه کې راغلي، چې دغه پېښه د ګلبهار د نساجۍ شرکت په بازار کې شوې ده.
دغه جبهه ادعا کوي، چې په دغه برید کې یې یو طالب وژلی او دوه تنه نور یې ټپیان کړي دي.
دغې جبهې زیاته کړې، چې د طالبانو د دغې ولسوالۍ د امنیه قوماندان برخلیک لاهم روښانه نه دی.
طالبانو لا په دې تړاو څه نه دي ویلي او نورو خپلواکو سرچېنو هم د دغې ادعا پخلی نه دی کړی؛ خو د ازادۍ جبهې تل په بېلابېلو برخو کې پر طالبانو د بریدونو ادعاوې کړې او له دغې ډلې سره په جګړه کې ده.
