سمیع سادات: د امریکا په ټاکنو کې له ډونالډ ټرمپ څخه ملاتړ کوو
د سمیع سادات په مشرۍ د افغانستان متحدې جبهې د امریکا په ټاکنو کې د جمهوري غوښتونکو له نوماند ډونالډ ټرمپ څخه خپل ملاتړ اعلان کړ.
د افغانستان د پخواني حکومت د پوځ مشر ویلي، چې بایډن " په افغانستان کې ناورین" رامنځته کړی او ټرمپ کولی شي سوله او ثبات بېرته راستون کړي. د افغانستان متحدې جبهې د سې شنبې په ورځ د (لړم اتمه) په یو لړ مراسمو کې چې د امریکا د متحده ایالاتو د استازو مجلس د بهرنیو اړیکو د کمیټې او د جمهوري غوښتونکي ګوند غړي ولید فارس، د ټرمپ د بهرنۍ پالیسي پخواني سلاکار او د جمهوري غوښتونکو غړي ډارل عیسی هم ګډون درلود د ښاغلي ټرمپ له نوماندۍ خپل ملاتړ اعلان کړ. د افغانستان د متحدې جبهې مشر جنرال سمیع سادات په افغانستان کې د امریکايي ځواکونو د کمولو په کار کې د بایډن د ادارې پر تګلارې نیوکه وکړه او ویې ویل، چې د طالبانو په وړاندې د افغان او امریکايي پوځیانو د ماتې یو مهم لامل د سپینې ماڼۍ پرېکړه وه. نوموړي د طالبانو د واکمنۍ پر مهال د افغانستان د خلکو او په ځانګړې توګه د ښځو وضعيت ته په اشارې سره وويل:« دا ټولې مسلې د افغانانو لپاره یو ناورين دی. دا ناورین د بایډن لهخوا رامنځته شوی. دا ناورین یقینا د مخنیوي وړ و؛ که مستقیمې اړیکې پرې شوې نه وای، موږ به طالبانو ته ماتې ورکړې وای.» ښاغلي سادات ټینګار وکړ، چې (د سپټمبر د ۱۵مې) په ټاکنو کې د ډونالډ ټرمپ بریا په افغانستان کې د سولې او ثبات د راتګ چانس زیاتوي.
هغه وویل چې ټرمپ "قاطع سړی" دی. دغه پخوانی افغان پوځي په دې باور دی:« که ډونالډ ټرمپ ولسمشر شي، هیڅوک به پر امریکا ګوزار ونه کړی. تاسو ګورئ ، هیڅوک ولسمشر بایډن جدي نه نیسي. د بهرني لید لوري څخه، هیڅوک به هم کمالا هرېس جدي ونه نیسي. موږ باور لرو، چې یوازې ولسمشر ټرمپ کولای شي غیر عادلانه جنګونه پای ته ورسوي.» نوموړي د خپلو خبرو په دوام وویل، چې له امریکا سره یو ځای کېدل غواړي. د افغانستان متحده جبهه چې تېر کال یې په متحده ایالاتو کې خپل حضور اعلان کړ، د هغو امریکایي پخوانیو سرتېرو په منځ کې نفوذ لري چې په افغانستان کې یې خدمت کړی دی.
