جرمني په برلین کې د ایران د سفارت مسوول احضار کړ
د جرمنيد بهرنیو چارو وزارت په برلین کې د ایران د سفارت مسوول د ایراني-جرمني توکمه جمشید شارمهد د اعدام په غبرګون کې احضار کړی. یاد وزارت پر خپل ایکس لیکلي، چې د شارمهد پر اعدام یې ایران ته خپل سخت اعتراض اعلان کړی او دا حق خوندي ګڼي چې نور ګامونه هم واخلي.
د جرمني د بهرنیو چارو وزیرې انالینا باربوک په تهران کې خپل سفیر مارک پوتزل د سلامشورو لپاره برلین ته بللی.
باربوک ویلي، چې شارمهد له دوبۍ نه ایران ته تښتول شوی و او له عادلانه محاکمې پرته په زندان کې وساتل شو او وروسته ووژل شو.
د جرمني د بهرنیو چارو وزیره وايي، دوی تهران ته دا پیغام رسولی و چې د نوموړي اعدام به ایران ته بدې پایلې ولري.
باربوک د شارمهد له اعدام وروسته وویل، « دا ښيي چې په تهران کې څه ډول بې رحمه رژیم واکمن دی. یو داسې رژیم چې له خپلو ځوانانو، خلکو او بهرنیو وګړو سره په مرګ چلند کوي».
د ایران قضایه ځواک ددوشنبې پر ورځ د جمشید شارمهد د اعدام خبر ور کړ.
نوموړی د ۲۰۲۳ کال په پسرلي کې د یوې جنجالي محاکمې په پایله کې د ترهګرۍ د تورونو له امله په اعدام محکوم شوی و.
د نوموړي د کورنۍ غړو او د بشري حقونو سازمانونو پر هغه لګول شوي تورونه رد کړي دي.
د جرمني لومړي وزیر اولاف شولڅ هم دغه اعدام غندلی دی.
