د هرېس په ټاکل کیدو سره به په نړۍ کې کوم بدلونونه رامنځته شي؟

که کماله هرېس د امریکا د ولسمشرۍ ټاکني وګټي نو، د دغه هېواد د ځواکونو او د هغوی د ګټو لپاره به د ایران او د هغه هېواد د ملاتړو ډلو په وړاندې له هیڅ ډول اقدام څخه پر شا نه شي.

د اسراییلو او حماس تر منځ د جګړې، د اوکراین پر وړاندې د روسیې د تیري او د اقلیم د بدلون په اړه د هغه دریځ د امریکا له اوسنۍ ادارې سره یو ډول دی.
د ۲۰۲۴ کال د نومبر په پنځمه د امریکا د ولسمشرۍ ټاکنو ته یوازې ۹ ورځې پاتې دي او د جمهوري غوښتونکو او دیموکراتو نوماندانو ترمنځ سخته سیالې روانه ده.
د امریکا د اوسني ولسمشر جوبایډن له استعفا وروسته هرېس د ډیموکراټ ګوند ټاکنیز کمپاین ته داخل شوه او که نوموړې د امریکا د ولسمشرې په توګه وټاکل شي، د دغه هېواد په کورنیو او بهرنیو سیاستونو کې د سترو بدلونونو احتمال به کم شي او اوسنۍ پالیسۍ به دوام ومومي.
له ایران سره د هرېس مخامخ کېدل
هرېس ایران په سیمه کې د یو جدي ګواښ او بې ثباته کوونکي ځواک په توګه پيژني او ژمنه یې وکړه چې تهران ته به هیڅکله اجازه ورنه کړي چې پوځي اټومي وړتیا ترلاسه کړي.
نوموړې ایران په سیمه کښې د اسراییلو، دامریکا دپوځیانو او ملکی وګړو دامنیت لپاره یو ګواښ بولي او ټینګار یې کړی، د ایران او دهغوی د پراکسي ډلو په وړاندې به دامریکا دګټو او پوځونو دساتلو لپاره هرډول اقدام وکړي.
هرېس تر اوسه په ځانګړي ډول نه دي ویلي، چې ایا د ټاکل کیدو په صورت کې به له ایران سره نوې اټومي موافقه تعقیب کړي او کنه.

د اسراییل او حماس ترمنځ د جګړې په اړه دریځ غوره کول
هرېس د بهرنۍ تګلارې په یوه تر ټولو سختو مسلو کې له اسراییلو د خپل قوي ملاتړ او له ځانه د دفاع په برخه کې د دغه هېواد د حق خبره کړې او د حماس له منګولو څخه یې د اسراییلي یرغمل شویو کسانو د خلاصون غوښتنه کړې ده.
هغې همداشان په غزه کښې د بشری حالاتو او د ملکی خلکو د مرګ ژوبلې په هکله اندیښنه څرګنده کړې او دغه حالت یې ناورین بللی او د غزې له ګڼ میشتو سیمو څخه یې د اسراییلو د پوځی ځواکونو د وتلو او د شخړو د ختمولو په اهمیت ټینګار کوي.

د روسیې د تیري په وړاندې له اوکراینه ملاتړ
هرېس د روسیې د تیري په وړاندې د اوکرایین د ملاتړ لپاره پر خپلې ژمنې ولاړ ده او څو ځله یې د اوکراین له ولسمشر ولادیمیر زیلینسکي سره کتلي دي.
هغې په دې وروستیو کې له اوکراین سره د انرژۍ، بشري مرستو او نورو مرستو په برخه کې د یو نیم میلیارد ډالرو مرستې اعلان وکړ او ټینګار یې وکړ چې په دې برخه کې اقدام نه کول به د روسیې ولسمشر ولادیمیر پوتین ته ګټه ورسوي.

د اقلیم عدالت ته ژمنتیا او د اقلیمې بدلون سره مقابله
هرېس، د پاریس په اقلیمې تړون کې د متحده ایالاتو ساتلو ته او د هغې د ولسمشرۍ د دورې له پیل تر ۲۰۳۵ کاله پورې د ګلخانه يي ګازونو د اېستلو او کمولو ژمنه ده.
نوموړې د اقلیم د عدالت د مدافع په توګه، د تیلو لوی شرکتونو څخه د اقلیم د بدلون په اړه د غلط معلوماتو خپرولو لپاره تر پوښتنې لاندې راویستي او د بایډن د اقلیمې بدلون د پالیسیو ملاتړ کوي.

د دوه اړخیزو پولو امنیت لایحه
هرېس ژمنه کړې چې د دوه اړخیزه سرحدي پولو د امنیت لایحه چې د روان کال په لومړیو کې جمهوري غوښتونکو د هغه ارزونه ځنډولي وه، کانګرس ته به یې د د تصویب په موخه وړاندې کړي.
په دې لایحه کې د سرحدي مامورینو د شمېر زیاتول، د پناه غوښتنې بهیر چټکول او د ویزو او ګرین کارتونو زیاتول شامل دي. نوموړې باور لري چې دا قانون د پولې هاخوا جرمونو سره د مبارزې لپاره اړین سرچینې چمتو کوي.
د جنین د سقط حقونه بیرته راګرځول
د هرېس یو له مهمو ژمنو څخه په ایالتې کچه د جنین د سقط حقونو ته د لاسرسي تضمین کول دي.
نوموړې وايي، که چیري دغه مسله د کانګرس له خوا تصویب شي، یاد قانون به لاسلیک کړي او ټینګار کوي، چې هغه به هیڅکله اجازه ورنکړي چې د سقط بندیز په قانون بدل شي.

د وسلو منع کول
هرېس ژمنه کړې چې په ټوله امریکا کې به پر وسلو بندیز ولګوي. هغې دا وسلې د "جګړې وسلې" وبللې او ټینګار یې وکړ چې په مدني ټولنه کې ځای نه لري.
نوموړې وسلو ته د خطرناکو خلګو د لاس رسي مخنیوي لپاره د سختو قوانینو ملاتړ کوي.

روغتیا پاملرنې ته د لاسرسي پراخول او د درملو لګښتونه کمول
هرېس د درملو د لګښتونو د کموالي په برخه کې د بایډن ادارې پلانونو ته دوام ورکوي او د ټولو امریکایانو لپاره یې د انسولین لګښتونو میاشتني ۳۵ ډالر او د نسخې درملو لګښتونو لپاره په کلني ډول د ۲۰۰۰ ډالرو ورکولو غوښتنه کړې.

د کور جوړول او د لومړي کور پیرودونکي ملاتړ کول
هرېس ژمنه کړې چې په څلورو کلونو کې به درې میلیونه د استوګنې کورونه جوړ کړي او باور لري چې دا اقدام به د کور لګښتونو کمولو کې مرسته وکړي.
نوموړې پلان لري چې د ساده کورونو او ارزانه کورونو جوړونکو ته د مالیې هڅونې چمتو کړي او د جواز ترلاسه کولو په پروسه کې د بیوروکراسۍ په کمولو ټینګار کوي.

د درملو جوړولو شرکتونو سره مقابله
هرېس ژمنه کړې چې د نسخې درملو لګښتونو کمولو لپاره به د بایډن ادارې تګلارې ته دوام ورکړي.
نوموړې په دې باور ده، چې امریکایان د نورو هیوادونو په پرتله د درملو لپاره ډیرې پیسې ورکوي، او هغه غواړي د درملو شرکتونو سره د انفلاسیون ضد قانون په تصویب سره د بیو د ټیټولو لپاره خبرې اترې وکړي.

اقتصادي ژمنې او د کوچني سوداګرۍ ملاتړ

هرېس وړاندیز کړی چې د نویو کوچنیو سوداګریو لپاره مالیاتي کسر له پنځه ډالرو څخه پنځوس زره ډالرو ته لوړ کړي او د دې سوداګرۍ لپاره بیوروکراسي اسانه کړي.
هغې ژمنه وکړه چې اړمنو یو میلیون متشبثینو ته به تر ۲۰ زره ډالرو پورې پورونه ورکړي.

په کابینه کې د یوه جمهوري غوښتونکي ټاکل

هرېس ژمنه کړې، که په ټاکنو کې بریالۍ شي، د نوموړې په کابینه کې به یو جمهوري غوښتونکی هم په دنده وګماري دا به د واړو ګوندونو ترمنځ د ګډ کار کولو د لیوالتیا نښه وي.
موږ باید د نومبر تر پنځمې پورې انتظار وکړو ترڅو وګورو چې آیا امریکایان به بالاخره د حارث ژمنې ومني.