د ایران بهرنیو چارو وزارت د اسراییل د برید ځواب کې وايي، د خپلې دفاع حق لري
د ایران بهرنیو چارو وزارت پر دغه هېوادد اسراییل بریدونه د نړیوالو حقونو او ملګرو ملتونو د منشور ښکاره خلاف ورزي بولي او وايي، چې ایران د بهرنیو تېرېو په مقابل کې د خپلې دفاع حق لري.
خو اسراییل بېګنی برید پر خپله خاوره د ایران وروستي توغندي برید ته په ځواب کې بولي او وايي له ځان د دفاع حق لري.
د اسراییل پوځ بېګا ناوخته وویل، چې د ایران پوځي تاسیسات یې په نښه کړي دي.
د ایران فارس خبري اژانس چې له سپاه پاسداران سره تړاو لري، راپور ورکړی چې د اسراییل د برید هدف د تهران په لویدیځ او جنوب لویدیځ کې څو پوځي اډې وې.
د ایران پوځ وايي، په دغه برید کې محدود زیان اوښتی او دوه سرتېري یې وژل شوي دی.
د دغه هېواد بهرنیو چارو وزارت په خپله اعلامیه کې دا برید د هېوادونو د ملي حاکمیت او ځمکنۍ بشپړتیا پرضد د زور کارولو د مخنیوي له اصل سره په ټکر کې بولي او غندي یې.
د ایران چارواکي وايي، د خپل امنیت د مهمو ګټو د دفاع لپاره به د خپل ملت ټولې مادي او معنوي وړتیاووې وکاروي.
په اعلامیه کې د هغو هېوادونو مننه هم شوې چې پر ایران یې د اسراییل پرونی برید غندلی دی او همدارنګه له نړیوالې ټولنې غوښتل شوي چې په سیمه کې د اسراییل د یرغلګرۍ مخه ونیسي.
دا په ایران کې د حماس د سیاسي دفتر د مشر اسماعیل هنیه تر وژل کېدو وروسته دویم توغندیز برید دی چې اسراییل یې د ایران د ورته بریدونو په ځواب کې کوي.
په دا مهال د اکسيوس خبريال باراک رويد د يوه اسرایيلي چارواکي په حواله ليکلي دي: "د اسرایيل امنيتي کابينې د جمعې په ماښام د يوه ټلويزيوني کنفرانس له لارې پر ايران د بريد پلان تصويب کړ."
