د مقاومت جبهې د کابل د چاودنې مسوولیت پر غاړه واخیست
د ملي مقاومت جبهې پر اېکس خواله رسنۍ خپور کړي پیغام کې ویلي، چې د کابل په کارته نو سیمه کې یې د طالبانو د استخباراتو پر ګزمې برید کړی او درې جنګیالي یې وژلي.
دغه جبهه وايي، چې له برید وروسته یې د وژل شوو طالبانو وسلې هم ترلاسه کړي دي.
تر دې وړاندې، د خواله رسنیو ځینو کاروونکو د کابل په کارته نو سیمه کې د یوې چاودنې خبر ورکړی و.
پر خواله رسنیو په خپاره شوو انځوورونو او ویډیوګانو کې له چاودنې وروسته له سیمې لوګی پورته کیږي او د ابولانسونو غږونه اوریدل کیږي.
ځینو سرچینو ویلي، چې چاودنه د طالبانو په رنجر موټر کې د ځای پر ځای شوو چاودیدونکو توکو له امله رامنځ ته شوې او وسله والو ته یې مرګژوبله اړولې.
طالبانو لا د دغې چاودنې په اړه څه نه دي ویلي.
