د ازبکستان لوی مفتي د طالبانو د رییس الوزرا له مرستیال سره وکتل

طالبانو ویلي، چې د ازبکستان لوی مفتي نورالدین خالق نظر د یو لوړ پوړي دیني پلاوي په مشرۍ کابل ته راغلی دی. د طالبانو د ریاست الوزرا دفتر وايي، چې د دغه لوړپوړي مذهبي چارواکي د سفر موخه د ازبکستان او افغانستان ترمنځ د اړیکو پراختیا ده.

د دغې ډلې په خبره، چې ریاست الوزرا اداري مرستیال عبدالسلام حنفي د پنجشنبې په ورځ له ازبک پلاوي سره کتلي دي.

په دې کتنه کې د ازبکستان ستر مفتي وویل، چې د افغانستان او ازبکستان د دیني، تاریخي او کولتوري مشترکاتو له امله دواړه لوري کولای شي په بېلابېلو برخو کې خپلې اړیکې پراخې کړي.

د طالبانو د اعلامیې له مخې، حنفي افغانستان ته د ازبکستان د مذهبي پلاوي سفر د افغانستان او ازبکستان ترمنځ د دوستۍ، نږدې اړیکو، ګاونډیتوب او ګډو ګټو نښه بللې ده.

د طالبانو د رییس الوزرا اداري مرستيال وويل: «دغه سفر د دواړو هېوادونو ترمنځ د ګډو همکاريو د ټينګښت او د اړيکو د پياوړتيا په برخو کې د اغېزناکو ګامونو د پورته کولو زمينه برابروي.»

کابل ته د ازبکستان د لوړ پوړي مذهبي پلاوي سفر په داسې حال کې کېږي، چې طالبانو د اسلامي نړۍ د ډېرو دیني عالمانو د عقایدو برعکس د شریعت په نوم د افغانستان پر خلکو سخت بندیزونه لګولي دي.