طالبانو د سرو زرو د ۹ خښتو دوه قاچاق کوونکي بری الذمه اعلان کړل
د طالبانو د سترې محکمې د دارالافتاء محکمې ریاست د څه باندې ۴۱ کیلوګرامه سرو زرو دوه تنه قاچاق وړونکي چې د جمهوري حکومت پرمهال نیول شوي وو، بری الذمه اعلان کړل.
یادې محکمې په خپله ۵۰۳ مه ګڼه فتوا کې د مصادره شویو ۴۱.۳۷۵ کیلوګرامه سرو زرو د استرداد حکم کړی او دواړه کسان یې د ممنوع الخروجۍ له نوملړه ایستي دي.
د بشیراحمد صدیقي او محمدرفیع بها په نوم دا دوه کسان د ۱۳۹۶ کال په زمري میاشت کې متحده عربي اماراتو ته د ۴۱.۳۷۵ کیلوګرامه سرو زروچې ۹ خښتې کېدې، د قاچاق په تور نیول شوي وو اود لویې څارنوالۍ له لویو جرمونو سره د مبارزې عدلي او قضایي مرکز په څلور کاله تنفیذي بند او د سل، سل زره افغانۍ په ورکړې او د سرو زرو په مصادره محکوم کړي وو.
د طالبانو د فرمانونو او حکمونو د تعقیب او نظارت لوی ریاست وایي، چې ددغو دوو کسانو دوسیه د ریاست الوزراء، لویې څارنوالۍ او د کابل مرافعه محکمې له څیړنو وروسته د سترې محکمې دارالافتاء محکمې وڅیړله او د دواړو د خوشي کېدو پرېکړه یې وکړه.
