د امریکا د دفاع وزیر د اوکراین جګړې ته د شمالي کوریا د پوځیانو لیږلو رپوټونه تایید نه کړل

د امریکا د دفاع وزیر لوید اسټن د شنبې په ورځ وویل، چې هغه راپورونه نه شي تاییدولی چې ګواکې شمالي کوریا د اوکراین پر ضد جګړه کې د روسیې د ملاتړ لپاره پوځيان لېږي. خو هغه وویل، چې که دا خبره ریښتیا وي، د اندېښنې وړ ده.

د سویلي کوریا د اطلاعاتو سازمان د جمعې په ورځ وویل، چې شمالي کوریا د روسیې په ختیځ کې د پوځيانو د روزنې او همغږۍ لپاره یو زرو ۵۰۰ ځانګړي ځواکونه ځای پر ځای کړي او احتمال لري چې د اوکراین په جګړه کې برخه واخلي.

د اوکراین ولسمشر ولادیمیر زېلېنسکي د پنجشنبې په ورځ پر شمالي کوریا تور ولګاوه چې د روسیې تر څنګ یې افسران ځای پر ځای کړي او د مسکو د جګړې لپاره د لس زره پوځیانو د استولو تیاری نیسي.

خو د ناټو عمومي منشي مارک روته په دې وروستیو کې وویل، چې د اوکراین په جګړه کې د پیونګ یانګ د لاس لرلو په اړه تر اوسه هېڅ شواهد نشته.

همدا راز، روسیې او شمالي کوریا دواړو د سویلي کوریا د اطلاعاتي سازمان او د اوکراین د ولسمشر دا ادعاوې رد کړې.