طالبانو په فاریاب کې د خپلو دوو غړو په ګډون د پنځو تنو وژل کېدل تایید کړل

د طالبانو د فارياب ولايت د امنيې قوماندانۍ له خوا په يوه خپره شوې خبرپاڼه کې راغلي، چې د پنجشنبې په ورځ (د تلې په ٢۶مه) په قيصار ولسوالۍ کې د وسله والو په بريد کې د دې ډلې د دوو غړو په ګډون پنځه تنه وژل شوي دي.

په فاریاب کې د طالبانو پولیس وايي، چې دا برید د «وسله والو غلو» کار و.

په خبرپانه کې راغلي دي، چې غلو د وسله والو طالبانو له شتون پرته د ملکي وګړو موټر درولی او لاره یې تړلې وه.

تر دې مخکې د فاریاب سیمه ییزو سرچینو افغانستان انټرنشنل ته ویلي وو، چې ناپېژاندو وسله والو په یو فلانکوچ ډوله موټر، چې له بادغیس ولایت څخه فاریاب ته روان و، برید وکړ.

د طالبانو په خبرپاڼه کې راغلي چې د دې ډلې دوه غړي له وسله والو غلو سره د نښتې په ترڅ کې وژل شوي دي.

طالبانو هم منلې چې د جګړې په ترڅ کې د یوې ښځې په ګډون درې ملکي وګړي وژل شوي او پنځه نور ټپیان دي.

طالبان وايي، چې د دې پېښې د عاملینو د پېژندلو لپاره پلټنې روانې دي.