د جرمني ولسمشر بایډن ته د دغه هېواد تر ټولو غوره نښان ورکړ

د جرمني ولسمشر فرانک والتر شټاین مایر، د امریکا ولسمشر جو بایډن ته د خپل هېواد د غوره نښان په ورکولو سره هیله څرګنده کړه، چې د دغه مډال په ورکولو به امریکا خپل متحدین د اتلانتیک دوه اړخیزو اړیکو په برخه کې د هغوی خدمتونو له امله په یاد ولري.

د رویټرز خبري اژانس د راپور له مخې، هغه ته دا نښان د جرمني او امریکا د اړیکو او د اتلانتیک ها خوا اړیکو په برخه کې د بایډن د پنځو لسیزو د خدمتونو له امله ورکړل شو.

له بلې خوا، د جرمني صدراعظم اولاف شولتز په برلین کې د امریکا د متحدو ایالتونو له ولسمشر سره په یوه ګډه خبري غونډه کې د حماس د مشر یحیی سنوار له مړینې وروسته، په غزه کې د اوربند د موافقې په اړه هیله مندي څرګنده کړه.

بایډن، چې د راتلونکي نومبر په میاشت کې د متحده ایالاتو د ولسمشریزو ټاکنو په درشل کې جرمني ته تللی، هڅه کوي د اروپایي شریکانو سره د اوکراین د جګړې او په منځني ختیځ کې د کړکېچ په څېر مسلو کې همکاري پیاوړې کړي.

له دې غونډې مخکې، بایډن پر اېکس پانې لیکلي و: «د پخوانیو دوستانو او موږ ته نږدې دوستانو د اتحاد پیاوړتیا ته چمتو یم؛ هماغه ډول چې د ازادۍ لپاره د ظلم پر وړاندې سره ولاړ یوو.»

تمه کیده، چې بایډن تېره اونۍ په مونیخ کې یوې غونډه کې ګډون وکړي، خو د میلتون د طوفان له امله دغه غونډه وځنډول شوه.