یو ایراني چارواکي د ایران پر پوله «بې اسناده» افغان وګړي د یرغلګرو په نوم یاد کړي
د ایران د پارلمان د ملي امنیت د کمېسیون غړي شهریار حیدري «بې اسناده» افغان کډوال «د سرحدي یرغلګرو» په نامه یاد کړي دي.
حیدري وايي، د بې اسناده افغان کډوالو شمېر په ایران کې «دوه مېلیونو» ته رسېږي او ټینګار یې وکړ چې «د هغوی نا قانونه اوسېدل په هیڅ ډول د منلو نه دي.»
د ایران د پارلمان د ملي امنیت او بهرني سیاست د کمېسیون غړي شهریار حیدري د ان لاین خبري اژانس سره په مرکه کې وویل:« موږ لږ تر لږه شپږ کاله وخت ته اړتیا لرو، چې دغه وګړي په نښه او له خپل هېواده یې وباسو، سره له دې چې زموږ موخه افغان وګړي دي؛ خو د عراق، پاکستان او بنګله دېش خلک هم په ایران کې اوسېږي.»
د ایران د پارلمان دغه غړي په مرکه کې چې د جمعې په ورځ د تلې ۲۷مه خپره شوه وویل، هغه افغانان چې له پخوا راهیسې په عراق کې اوسېدل او وروسته ایران ته کډه او همدلته باتې شول هغوی نه افغانان دي، نه عراقیان او نه هم ایراني هویت لري. هغه وویل چې په ایران کې د هغوی ستونزه هم باید هواره شي.
دغه ایرانی چارواکی داسې مهال په ایران کې بې اسناده افغان وګړو ته پر هغه هېواد «د سرحدي یرغلګرو» ټکی کاروي چې د ایران لهخوا د افغانانو لپاره شرایط سخت شوي او د بې اسناده افغان کډوالو ایېتنې هم زور اخیستی.
د بشري حقونو د حال وش سازمان د چهارشنبې په ورځ راپور ورکړ، چې ایراني پوله ساتو پر هغو افغانانو برید کړی چې ایران ته وراوښتل او له امله یې لسګونه کسانو ته مرګ ژوبله اوښتې وه.
له دغه خبر سره سم د بشري حقونو ګڼو بنسټونو پر ایران نیوکې وکړې او په دې برخه کې یې د رڼو پلټنو غوښتنه وکړه.
