د بښنې نړیوال سازمان د افغانانو وژل بوږنوونکې پېښه بللې ده
د بښنې نړیوال سازمان د سویلي اسیا سیمه ییز دفتر د ایراني پوله ساتو ځواکونو په ډزو کې د افغان وګړو مرګ ژوبله غندلې او ددې پېښې د پلټنې غوښتنه یې کړې ده. دغه سازمان وايي، چې د حال وش بلوڅ بشري حقونو سازمان د رپوټ له مخې، په دې پېښه کې ګڼو کسانو ته مرګ ژوبه اوښتې ده.
د بښنې نړیوال سازمان په دې اړه خپاره شوي رپوټونه بوږنوونکي بللي او ټپیانو ته په پاکستان او ایران کې د درملنې خدماتو د نه رسېدو د ادعاوو په اړه یې اندېښنه ښودلې ده.
دا سازمان د غیر قانوني وژونکي قوت د کارونې په تړاو، چې د افغانانو د مرګ لامل کیږي، د چټکو، رڼو او بې پرې او اغیزناکو پلټنو غوښتنه کړې ده.
د ایران د بشري حقونو سازمان حال وش وړمه شپه رپوټ ورکړ، چې د ددغه هېواد د سراوان په پوله کې د ایراني پوله ساتو ځواکونو د ډزو په پایله کې ګڼ افغانان وژل شوي دي.
یاد سازمان د پاکستان په بلوچستان ایالت کې د یوه سیمه ییز کلینیک د کارکوونکو له خولې ویلي، چې د پېښې یو شمېر ټپیان ماشکیل سیمې ته لیږدول شوي وو خو د پولیسو د راتګ له امله چې دوسیې یې ثبت نه شي، بېرته تللي دي.
د طالبانو مرستیال ویاند حمدالله فطرت له اوږده ځنډ وروسته نن اعلان وکړ، چې د دې ډلې ریاست الوزرا د ایران او پاکستان پر پوله د افغانانو د مرګ ژوبلې د راپورونو د څېړلو او پلټنو لپاره یوه پلاوي ته دنده سپارلې ده.
په دغه پلاوی کې، چې د طالبانو د کورنیو چارو وزارت امنیتي مرستیال ابراهیم صدر یې مشري کوي، د دې ډلې د ملي دفاع، بهرنیو چارو او سرحدونو وزارتونو او د استخباراتو لوی ریاست استازي شامل دي.
